মহৌশা ঈপা-ঈপূশিংনা, হৌরক্লিবা তুংগী মীরোলদা কান্নবা, খুদোংচাবা পীবিরম্বা ওইনা মীয়ামগী লন ওইহৌনবা খোংলম ওইনা, ফুট ৩৩ পাক্না থম্বিরম্লবা খোংলম অসী মতমগী মতূঙ ইন্না লিলোং হাওরৈবী এরিয়াগী মীয়াম্না চহী ২৫ গী মমাঙদা লম্বী ওন্থোকখিবনি। ঙসীদি মফম অসী হাওরৈবী আইদিয়ল দেভলপমেন্ট এসোসিয়েসন ( হিদা) না কূপ্না ওন্থোক-ওন্সীন তৌদুনা য়েংলুবদা লম্বীগী অপাকপসি ফুট ২০ খক্তমক ওইরম্লে হায়না হিদাগী জেনরেল সেক্রেটরি বি সি য়ুনুস অটিকুরনা পেন্দবা ফোঙদোকখ্রে।
ঈপা-ঈপূশিংনা তুংগী মীরোলগী খুদোংচানবা থম্বীরম্লিবা, হৌজিক্না লম্বী অমা ওইনা মীয়াম্না শীজীন্নরিবা মফম অসী হান্নদি ফুট ৩৩ চপ চানা পাক্লম্বনি। মতমগী মতূঙ ইন্না লম্বী অসীগী নাক-য়েৎতা, লৌবূক্কি শরূক্তা য়ূম তাশিল্লক্লিবা মীওইশিং অসীনা লম অসুম অসুম খোপচীল্লকপদগী ঙসীদি শুপ্নগী ফুট ২০ খক্তা ঙায়রে। মরম অদুনা মহৌশা লৈরম্বা ফুট ৩৩ অদু ফংননবা পাকথোক-চাউথোক্লগনি। অয়েৎপা পীনিংবা মীওইশিংনা লাক্লিবা জুলাই থাগী অমা ফাওবদা এসোসিয়েসন অসীদা অইবা চেরোল পীদুনা ৱাকৎপা য়াগনি, মদুগী মতূঙতাবা ৱাকৎ লৌরোই হা অটিকুরনা খঙহল্লক্লি।
মসীগী মতাঙদা মনিপুর লৈঙাক্কি দিরেক্তরেট ওফ সেটলমেন্ট এন্দ লেন্দ রেকোর্দস তগী মরী লৈনবা দোক্যুমেন্টশিংসু এসোসিয়েসন অসিগী খূত্তা লৈরে, অথুবা মতমদা ইভিক্সন চত্থদুনা লম হেঞ্জিল্লম্বা খূদীঙমক তকথোক্লগনি হায়রি।মফম অসী রেভিন্যু ভিল্লেজ নম্বর ১৫ – হাওরৈবীগী সিট নম্বর ৪, দাগ নম্বর ৩১৪৮ অমসুং সিট নম্বর ২, দাগ নম্বর ১৫৫৯ গী মনূঙচন্না লৈরিবনি হায়রি।
