কাচীং-কালাই ককচীং অমসুং শীজা আই ক্যের ফাউন্দেসন ইম্ফাল অনীনা খূৎশম্নদুনা নোংমগী ওইবা লেম্না মীৎ লায়েঙবগী কেম্প অমা ঙরাং ককচীং কৈথেলদা লৈবা ক্রিষ্ণচন্দ্র মান্দোপতা পাঙথোকখ্রে।
অহল ওইরবশিংদা মীৎ নুঙাইতবগী খুদোংচাদবা কয়া মায়োক্নরি। অঙাঙ অহল খায়দনা মোবাইল ফোন শীজীন্নবগী চাং হেল্লকপদগী মীৎ শোকপগী মশীং নোংমা নোংমগী হেঙ্গৎলক্লিবা অসীগী মতাঙদা মীয়ামদা ৱাখল তাহনবগা লোয়ননা লেম্না মীৎ লায়েংবগী কেম্প অদূ পাঙথোকখিবনি হায়না থৌরমদুদা শরূক য়াখিবা কাচীং কালাই, ককচীংগী সেক্রেটরি জেনরেল ওইনা থৌ পুরিবা ময়াংলম্বম রোমেসনা ফোঙদোকখি।
শীজা আই ক্যের ফাউন্দেসন ইম্ফালগী মেনেজমেন্ট টিম, ষ্টাফশিং, দোক্তরশিং অমদি নর্স কয়া শরুক য়ারদুনা পাঙথোকখিবা লায়েঙবগী কেম্প অদুদা ঙৌদোং, দাইবেটিসনা থোকহনবা মীৎকি অনাবশিং, মীৎকি প্রেসর ৱাংবা, মীৎকি ফীভম শোয়না পোকপা, মীৎফম কাখৎপা, মীৎ ঙাঙশল্লগা হাক্কচ্চবা ফাওবা, অতৈ মীৎকি লায়না-লাইওং কয়াগী মতাংদা স্ক্রিনিং তৌখি। কেম্প অদূদা পূন্না মীওই ৩০০ হেনবদা লেম্না লায়েঙখি।
