ওল মনিপুর ৱার্কিং জর্নেলিষ্ট য়ুনিয়ন (অমজু) গী জেনরেল সেক্রেটরি ওইনা থৌ পুরম্বা গুরু অরিবম নাউচা শর্মা মশাগী অনাবা অমনা মরম ওইদুনা মতম শাংনা লায়কন্নদুনা লৈরম্লবা মতূঙদা ঙরাং অয়ূক পূং ৫.৩০ রোম তাবদা লৈখিদ্রে।
মহাক মশাগী চহী ৫৫ শুখ্রে। মহাক সহারা টি ভি অমসুং এ এন আই ন্যুজ এজেন্সিগী করেস্পোন্দেন্ট ওইরম্মি অদুগা ইম্ফাল টাইম্স পাউচেদসু মতম শাংনা থবক তৌরম্মি।
মহাক কুমশিং ২০১১ দগী ২০১৩ ফাওবা অমজু ষ্টেন্দিং কম্মিটিগী মেম্বর ওইনা থৌ পুরক্লবা মতূঙদা কুমশিং ২০১৩ গী জূন ১ দগী কুমশিং ২০১৫ গী জূন ১ ফাওবা য়ুনিয়ন অসীগী জেনরেল সেক্রেটরি ওইনা থৌ পুরম্বা পাউমী অমনি।মহাক্কি লোয়নবী অমসুং মচা অনী লৈহৌরি।
পাউমী অসীনা লৈখিদবদা মনিপুর প্রেস ক্লবতা অৱাবা ফোঙদোকখিবগা লোয়ননা লৈ-শু কত্তুনা লৈখিদ্রবগী মফমদা ঈকায়খুম্নবা ঊৎখি।
