কুকি- জো কম্যুনিটিনা হৌজিক মায়োক্নরগা লৈরিবা অৱাবা খুদোংচাদবা কয়াগী মতাংদা মনিপুরগী গভর্নরদা পুখৎখিবগা লোয়ননা মখোয়শিংদু কোকহনবিনবা পোইন্ট ১৬ কি অইবা চেরোল অমা পীশীন্দুনা তকশীনখ্রে।
চুরাচান্দপুরগী দিপ্যুটি কম্মিস্নারনা শীন্দুনা গভর্নরগা উনখিবগী মীফম অমা চৎলিবা থা অসীগী ১৯ দা দি সি ওফিসতা পাঙথোকখিবদা কুকি- জো কাউন্সিলগী মায়কৈদগী পোইন্টশিং অদূ য়াওবা চেরোল অমা পীদুনা তকশীনখিবনি। কাংপোকপী, চুরাচান্দপুর, চান্দেলনচিংবা মফমশিংদা মীয়াম্না মৈ চাং নাইনা ফংদবগী খুদোংচাদবা মায়োক্নরগা লৈরি।
লম্বী-থোংশিংগী ফীভম কা হেন্না ফত্তনা লৈরি, টিপাইমুখ লম্বীদা ঙাইহাক লৈতনা চীঙ নীংখায়বগী থৌদোকশিং থোক্লি। হায়রিবশিং অসীগী ফীভম ফগৎহনবিয়ু লোয়ননা নৌনা শেমগৎ-শাগৎপীয়ু হায়না তকশীনখি।
চান্দেল এরিয়াগী ইম্ফাল তুরেলগী মথক্তা থোং অমা নৌনা শেমগৎ-শাগৎপীয়ু, চান্দেলগুম্বা সেন্সিটিব ওইরিবা এরিয়াশিংদা মীচঙ-মীখায় নাইদবা ওফিসিয়েলশিং থম্বিনবা, অদুগা থোইদোক-হেন্দোক্না চান্দেলদা মীচঙ-মীখায় নাইদবা, লোকেল মীয়ামগী ৱেলফ্যের নীংথীনা য়েংশিনবিগদবা দি সি অমা থম্বিয়ু হায়না তকশীনখি।
ট্রান্সপোর্ট, পুলিস অমসুং রিভিন্যু ওফিসিয়েলশিং মীচঙ-মীখায় নাইদবশিং খল্লগা থম্বিনবসু তকশীনখি।
কুকি- জো এরিয়াদা এম পি এস সিগী এগজামিনেসন পীনবগী খুদোংচাবা ফংহনবিয়ু, পেন্দিং লৈরিবা মহৈরোয়শিংগী স্কোলারশিপ পীথোকহনবিয়ু অদুগা মোরে অমদি সেমকো কোল্লেজশিংদা থবক তৌরিবা ষ্টাফশিংগী সেল্লেরি এরিয়রনচিংবসু পীথোকপিননবা তকশীনখি।পূম্নমক অথুবা মতমদা য়েংশিন্দুনা থবক্তা ওন্থোক্ননবা হোৎনগনি হায়না গভর্নরনা থাজবা পীখি। মীয়ামগী ৱাকৎশিং গভর্নরনা পূক্নিং চঙনা তাবিবা অমসুং মীফম অদূবু শীনবিখিবগীদমক কাউন্সিলনা মনিপুরগী গভর্নর অমসুং চুরাচান্দপুরগী দিসি অনীমকপু থাগৎখি।