কোকোমিনা মীয়ামগা লোয়ননা খোঙজঙ হেন্না কন্সীন্নবা ৱারেপশিং লৌখ্রে

হৌখিবা কুমশিং ২০২৩ গী মে অহূমদগী কুকি -জো কাঙলূপকি মিলিটেন্টশিং না লুচিংদুনা চত্থরকখিবা মনিপুরগী হীঙশা অসীগী অহানবা মতাঙশিংদগী কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) না মীয়ামগা লোয়ননা খোঙজঙ কয়ামরুম চঙশীনমিন্নদুনা লাকখিবা মতমদগী ঙসীফাওবদা তোঙান তোঙানবা মীফমশিং পাঙথোক্তুনা লৌরকখিবা ৱারেপশিং অদূ, ঙরাং পাঙথোকখিবা মীয়ামগী অচৌবা মীফম অমনা,  অমূক মখা তানা চেৎশীলহনখ্রে। পব্লিক কনভেন্সন অদূ ঙরাং ইম্ফাল ইষ্ট দিষ্ট্রিক্টকি পেলেস কম্পাউন্দদা লৈরিবা ইবোয়াইমা শুমাঙ লিলা শঙলেন্দা পাঙথোকখিবনি।কোকোমিনা শীন্দুনা পাঙথোকখিবা পব্লিক কনভেন্সন অদূদা লাইরিক-লাইশু নীংথীনা খঙ-হৈরবা একাদেমিসিয়ানশিং, মীয়াম্না শকখঙনরবা সেনিয়র জর্নেলিষ্টশিং, এদভোকেটশিং, জজ ওইনা থৌ পুরম্বা মীওই কয়াগী অনীঙবা, অপাম্বশিং চেরোল ওইনা ইরগা পীশীলহনখি।মীয়ামগী অপাম্বা, অনীংবশিং অদূ খন্ন-নৈনরবা মতূঙদা অমত্তা ওইনা ৱারেপ ৭ লৌদুনা থবক্তা ওন্থোকপদসু য়ান্নখি।

হৌখিবা এপ্রিল তরেত্তা কুকি -জো কাঙলূপকি মিলিটেন্টশিংনা পীক্লিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক, নুমিৎ অদূমক্তদা মীয়াম্না চঙশীল্লকখিবা ঈহৌদা সি আর পি এফ পার্সনেলশিংনা নোংমৈ কাপথোরকপদা মীওই অহূম লৈখিদবা অমদি এপ্রিল ১৮ দা কুকি মিলিটেন্টশিংনা তাঙ্খুল ফূরূপকি মীচম অনী নোংমৈনা কাপতুনা হাৎখিবা থৌওংশিং অদূবু য়াম্না কন্না য়ানিংদবা ফোঙদোক্নখিবগা লোয়ননা থৌদোকশিং অদূগী মতাঙদা লৈঙাক্না জুদিসিএল ইনক্বারি চৎথহন্ননবা কোকোমিনা অরৈবা শক্তি পূম্নমক শীজীন্নদুনা দেমোক্রেটিক ওইবা খোঙজংশিং চঙশীনবা অসীনচিংবা ৱারেপশিং লৌখি।

মনিপুরগী তোঙান তোঙানবা মফম কয়াদসু , কুকি মিলিটেন্টশিংনা মৈতৈ কম্যুনিটিগী মথক্তা লান্দারক্তুনা নূপী-অঙাঙ কয়ামরুম হাৎপা, য়ূম মৈথাদুনা অৱাবা মায়োক্নহল্লকখিবা থৌদোক অদূগী চহী অহূম মপূঙ ফারকপগী কুম্মোন থৌরমশিং, ঙরাং পাঙথোক্নদুনা পেন্দবগী খোল্লাউশিং লাউখি।