ফত্তবা চেদা লাইরিক নম্বা থিংঙু য়াদবা, শেঞ্জা-থুমজা তৌরিবসি থিগৎহল্লু য়াদবা সি এম ফম থাদোকপিরো:দেসাম

মনিপুরদা মহৈরোয়শিংনা তমগদৌরিবা, শীজীন্নগদৌরিবা লাইরিকশিং অসী খ্বাইদগী অনেম্বা অমসুং হন্থবা থাক্কি চেদা নম্লি।মহৈরোয়শিংগী লাইরিক নম্বদা খ্বাইদগী ফত্তবা, অহোঙবা চে শীজিন্নরিবসি শেঞ্জা-থুমজা তৌরে, হাবী-জাবী চত্থরে হায়বগী তশেং-তশেংলবা খূদম অমনি। মসীগী মতাঙদা হায় পৱার কম্মিটি অমা শেমদূনা থিগৎহল্লু হায়দুনা দেমোক্রেতিক ষ্টূদেন্টস এল্লাইন্স ওফ মনিপুর (দেসাম) না হৌখিবা থা তরুক্কি  মমাঙদগী অকনবা খোঙজঙগা লোয়ননা দেসাম্না লৈঙাক্কি মফমদা তকশীন্দুনা লাক্লি।

মহৈরোয়শিংনা খোল্লাউ কয়াগা লোয়ননা ওফিসিয়েলশিংগী মথক্তা খোঙজঙ চঙশীন্দুনা লাক্লবসু হৌজিক লৈরিবা চিফ মিনিষ্টর অসীনা ঙসীফাওবা থৌশাদনা, তূমিন্না য়েংদুনা লৈথোক্লি। হন্দক্কি চিফ মিনিষ্টর অসী ইদুকেসনগী হীরমদা দাইত্যা অমত্তা লৌরকপা উদে। মহাক্তি ইদুকেসনগী মতাংদা করিমত্তা থৌশাদে।মরম অদূনা চিফ মিনিষ্টর অসী খূদক্তা ফম থাদোকউ হায়না দেসাম্না অকনবা দাবী তৌখ্রে।

ঙরাং নুমিৎয়ুংবা মতম অদুৱাইদা মশীঙ য়াম্লবা দেসামগী নূপীমচা অমসুং নূপামচা মহৈরোয়শিংনা বোর্দ ওফ সেকেন্দরি ইদুকেসন মনিপুর (বোসেম) গী ওফিসতা থোমজীল্লকখি। মখোয়না তোঙান তোঙানবা প্লেকার্দশিং শীজীন্নদুনা অকনবা খোল্লাউশিং লাউখি।বোসেমগী চ্যেরমেন, সেক্রেটরি অমসুং ইদুকেসন কম্মিস্নার খূদক্তা মফম লৌথোকউ হায়না অকনবা দিমান্দ তৌখি।

ইম্ফাল পুলিস ষ্টেসনগী এস দি পি ওনা লুচিংবা পুলিসকি টিম্না মহৈরোয়শিং অদূ বোসেমগী ওফিসতা চঙখিদনবা গেট্টা থত্তুনা থমখি। মফমদুদা মহৈরোয়শিং অমসুং পুলিসকি মরক্তা মূক্নখি।