চিফ মিনিষ্টরগী ৱাফম অরানবনি, সেন্সস তৌদ্রিঙৈদা এন আর সি হান্না পায়খৎকদবনি: জে এফ দি

নেস্নেল রেজিষ্টর ওফ সিটিজন্স (এন আর সি) অসী সেন্সস ওপরেসন লোইরবা মতূঙদা পায়খৎকদবনি হায়না চিফ মিনিষ্টর য়ূম্নাম খেমচান্দনা মীয়ামদা ফোঙদোকখিবা ৱাফম অদূ মনিপুরগী মীয়াম্না কৈদৌনুংদা য়াবা ঙম্লোই। চিফ মিনিষ্টরগী ৱাফম অদু লৌখৎপা য়াদবা, অরানবনি হায়না কেম্পেইন ফোর জষ্ট এন্দ ফেয়র দিলিমিটেসন (জে এফ দি) গী ওর্গানাইজেসন সেক্রেটরি লোংজম রতনকুমারনা ফোঙদোকখ্রে।
সেন্সস পাঙথোক্ট্রিঙৈ মমাঙদা নেস্নেল রেজিষ্টর ওফ সিটিজন্স (এন আর সি) গী থবক হান্না লৌখৎকদবনি হায়বসি জে এফ দিগী লেঙদ্রবা পান্দম্নি। মসী মনিপুর মীয়ামগীসু অপাম্বনি।লমদমসিদা এন আর সি গী থবক পায়খত্রিঙৈদা সেন্সস পাঙথোকপা কৈদৌনুংদা য়াহল্লোই হায়না রতনকুমারনা চেকশীল ৱাফম থমখি।
ইম্ফালগী ৱাঙ্খৈদা লৈবা জে এফ দিগী ওফিসতা পাউমীশিংগা উনবদা রতনকুমারনা ৱাফম অসী ফোঙদোকখিবনি। মহাক্না হায়, সেন্সস অমসুং এন আর সি হায়বসি পান্দম মান্নদবা, তোঙান তোঙানবা থৌরাং অমমম্নি।সেন্সসতা লৈবাক অসীগী সিটিজন ওইবা অমসুং ওইদবা অনীমক মশীঙ থীবদা য়াওগনি অদূগা এন আর সি হায়বসিদনা লিগেসি দেতা অমদি সিটিজন্সিপ এক্ট,১৯৫৫ গী মখাদা ভেলিদ দোক্যুমেন্টশিং অমদি লিগেসি দেতা দা য়ূম্ফম ওইরগা ইন্দিয়াগী সিটিজন কনা কনানো হায়বদু মশক খঙদোক্কদৌরিবনি।এন আর সি অমসুং সেন্সস হায়রিবা এন্টাইটি অনী অসী মরী লৈনহনবা চুমদে।চিফ মিনিষ্টরনা হন্দক, সেন্সস লোইরগা এন আর সি তৌগনি হায়না ফোঙদোকখিবা অদূনা মীয়ামদা চমম্নবা পোকহল্লে হায়না রতনকুমারনা ফোঙদোকখি।
হৌজিক মনিপুরদা থোক্লিবা ৱাথোক অসীদি আইন কায়না লোন্না মনিপুরদা চঙশীল্লক্লিবা মীতোপশিং অসীনা থোকহনবনি।লৈরিবা ফীভম অসীদা সেন্সস পায়খৎপা তারবদি অচূম্বা মশীঙ অদূ ফংবা ঙম্লোই।এন আর সি হান্না পায়খত্তুনা মীতোপ খন্দোক্লবা মতূঙদা সেন্সসকি থৌরাং তৌবিয়ু।মসী নত্রবদি মনিপুরদা সেন্সস পায়খৎপা শুংয়া য়াবা ঙম্লোই হায়না রতনকুমারনা মখা তানা ফোঙদোকখি।