বেজ ইয়র য়াওদনা এন আর সি অপদেট তৌবা য়ারোই: জে এফ দি

ষ্টেট লৈঙাক অসীনা হৌজিক চৎথরিবা এসেমব্লি সেসন অসীদা এন আর সি অপদেট তৌননবা ইন্দিয়া লৈঙাক্তা তকশীন্ননবা লৌখিবা ফিরেপ অদু থাগৎলি অদুম ওইনমক জে এফ দি অমসুং মীয়াম্না দিমান্দ তৌরিবদি কুমশিং ১৯৫১ দা বেজ ইয়র ওইরগা এন আর সি অপদেট তৌবা হায়বসিনি। কুমশিং ১৯৫১ দা বেজ ইয়র ওইদবা মওংগী এন আর সি অদূদি মনিপুরগী মীয়াম্না কৈদৌনুংদা য়াবা ঙম্লোই হায়না জে এফ দিগী ফাইনান্স সেক্রেটরি সুনিল করাম্না ফোঙদোকখ্রে।

ঙরাং থাংমৈবন্দ য়ূম্নাম লৈকায় পন্থোইবী ৱিমেন্স এসোসিয়েসন্না শীন্দুনা এসোসিয়েসন অসীগী ওফিস কমপ্লেক্সতা, “”নো এন আর সি, নো সেন্সস” হায়বা খোঙজঙ শৌগত্তুনা চত্থখিবা ৱাকৎ মীফমদা সুনিলনা ৱাফম অসী ফোঙদোকখিবনি। মহাক্না মখাতানা হায়, হন্দক মনিপুর লৈঙাক্কি মায়কৈদগী এন আর সি অপদেট তৌনবগী মতাঙদা লৌখিবা ৱারেপ অদূ বেজ ইয়র য়াওদে। ইন্দিয়া অমসুং মনিপুর লৈঙাক্না বেজ ইয়র য়াওদনা এন আর সি তৌননবা ৱাফম লাউথোরক্লিবসি মশা ঙাকথোকপা, লৈথোকপা য়াননবা হোৎনবনি হায়না লৌই। কুমশিং ২০২২ দা ষ্টেট এসেমব্লিনা এন আর সি অপদেট তৌননবা লৌখিবা ৱারেপ অদূ কুমশিং ২০২৪ দা রিএফার্ম তৌখিবনি। ৱারেপ অনীরক লৌখ্রবসু থবক্তা ওন্থোকপা তৌদনা লৈরকখ্রবনি। মদূ হন্দকসু অমূক রিএফার্ম তৌরকপগী ৱাফমখক্তনি হায়খি।

অমরোমদা হায়রবদি এসেমব্লিনা নৌনা ৱারেপ লৌবা নত্তে, হান্নগী ৱারেপ্ অদূমক রিএফার্ম তৌবখক্তনি হায়না সুনিল করাম্না ফোঙদোকখি।সেন্সস য়ৈথোক্লে হায়বগী চপচাবা ওর্দর ঊৎলূ, মনিপুরগী অপূনবা শক্তম কায়বা য়ারোই, নো আই দি পি সেটলমেন্ট, নো সেন্সস, বেজ ইয়র ১৯৫১ য়াওদনা এন আর সি অপদেট তৌবা য়ারোই হায়বা খোল্লাউশিং ৱাকৎলোয়শিং অদূনা লাউখি।