অমিট শাহানা অমূক হন্না খূদক্কি ওইনা কৌরকপদগী সি এম দিল্লি য়ৌখ্রে

চৎলিবা আগষ্ট থা অসীগী ২৬ তা য়ুনিয়ন হোম মিনিষ্টর অমিট শাহা অমসুং মনিপুরগী চিফ মিনিষ্টর য়ূম্নাম খেমচান্দ অনীনা ন্যু দিল্লিদা উনদুনা, ষ্টেট অসীদা হৌজিক মীয়াম্না তাল্লিবা দিমান্দশিং, মরূওইনা এন আর সি অপদেট তৌগদবনি, সেন্সস য়ৈথোক্কদবনি, মীতোপ হান্না মশক খঙদোক্তুনা মশাগী মরমদমদা হলহনখিগদবনি হায়বনচিংবা খোল্লাউ কয়াগা লোয়ননা চত্থরিবা খোঙজঙশিং অসীগী মতাঙদা খন্ন-নৈনরুরবা মতূঙ, চয়োল অমা ফাওবা য়ৌদ্রিঙৈ চৈরকশিদা হোম মিনিষ্টর অমিট শাহানা খূদক্কি ওইনা অমূক কৌরকপদগী চিফ মিনিষ্টর খেমচান্দ ঙরাং নুংথিল ইম্ফাল থাদোকখ্রে।হোম মিনিষ্টরনা কৌরক্লিবা অসীগী মরমশিংগী মনূঙদা খ্বাইদগী মরূ ওইবা অমা ওইরিবনা “নো এন আর সি, নো সেন্সস” হায়বসিমদি সেন্ট্রেল পোইন্ট অমনি হায়না রাজনিটি নৈনবশিংনা পানরিবনি। মসীমক তশেংনা অচূম্বা অমনি হায়বসিদা সধারন মীয়াম্নসু য়ানরিবনি।

কৌরক্লিবা অসীগী অতৈ ওইথোকপা য়াবা, মখাতাবা মরম খরা পনবা তারবদি মনিপুরদা হাঙদুনা লৈরিবা বি জে পি মনিপুর প্রদেসকি প্রসিদেন্টকি ফম অসী কনাবু পুহনগদগে হায়বসিনি। মীখলগী মতম নকশীল্লকপগা লোয়ননা মতীকচাবা বি জে পিগী প্রসিদেন্ট অমগী মখাদা মীয়ামদা কেম্পেইন তৌদুনা মথঙগী মীখলদা মায় পাক্ননবা থবক পায়খৎপগী মতাঙ অসীসু মরূওইনা খন্নরবা য়াই হায়রি। মতাঙ অসীদা পনবা য়াবদি হান্নগী চিফ মিনিষ্টর এন বিরেন অসী মীয়াম্না বি জে পিগী প্রসিদেন্ট ওইনা থৌ পুহন্নিংবা লুচিংবশিংগী মনূঙদা অমা ওইরিবনি। সেপ্তেম্বর অনীদগী হৌগদৌরিবা ষ্টেট এসেমব্লিগী সেসন অসীগী মমাঙদা খেমচান্দগী মিনিষ্ট্রি এক্সপান্দ তৌননবা ৱাফম খন্নরম্লবনি অদুবু হোজিক লৈরিবা মীয়ামগী ঈহৌ, ঈরাং অসীনা মরম ওইরগা এসেমব্লি সেসন অসীগী মতূঙদা এক্সপান্সনগী থবক চত্থনবা সেন্টরনা খঙহল্লকপসু লৈখ্রবনি। মিনিষ্ট্রি এক্সপান্সনগী মতাঙ অসীমসু খন্নরবা য়ারিবনি।

এন আর সি অপদেট তৌরুবদা কোন্না ইন্দিয়াগী অতৈ মফমশিংদসু চয়েৎনবা, খুরৌ থাংবা কয়া থোক্লকপা য়াবা লৈ হায়না খল্লবা মতূঙদা মতৌ করম্না মনিপুর মীয়ামগী অপাম্বা অসিমসু থবক্তা ওন্থোক্তুনা মীতোপ করম্না খন্দোকপা য়াগদগে হায়বসিদা চিফ মিনিষ্টরগী ৱাখল্লোন খঙনীংবদগী কৌরকপসু ওইরম্বা য়াই হায়না পানরি। মনিপুরগী খ্বাইদগী নৌনা ওইরক্লিবা লো এন্দ ওর্দরগী ফীভম, পোলিটিকেল সিনারিও অসীনচিংবগী মতাঙদসু খন্নরবা য়াই হায়না মীয়াম্না পানরি।