মনিপুর লেজিসলেটিব এসেমব্লিগী হান্নগী দিপ্যুটি স্পীকর অমসুং ৪৫- চিঙাই এ সিগী এম এল এ ওইরম্বা, বি জে পি মনিপুর প্রদেশকি স্পোক্সপার্সন এম কে প্রিসো শিমরে অমদি ৱান ইন্দিয়া ফাউন্দেসন ন্যু দিল্লিগী ফাউন্দর নেস্নেল জেনরেল সেক্রেটরি সনা মৈত্রম অনীনা ইম্ফালগী আর্কবিসোপ এমরিটস মোষ্ট রেবরেন্দ দোমিনিক ল্যুমোনগা উনদুনা ৱারী ৱাতায় শান্নখ্রে। ইম্ফালগী মন্ট্রিপুখ্রিদা লৈবা আর্কবিসোপ অসীগী রেসিদেন্স ওইরিবা সেন্ট জোসেপ্স হোমদা লুচিংবা অনীনা চত্তুনা ঙসী দোমিনিক কা উনখিবনি।
প্রিসো শিমরে অমদি সনা মৈত্রম অনীনা সেন্ট জোসেপ্স কেথেদ্রেল মন্ট্রিপুখ্রিগী পারিস প্রিয়েষ্ট ওইনা লৈরিবা রেবরেন্দ এফ আর ঙানিংমি ফ্রান্সিস কসু উনরকখি। মোষ্ট রেবরেন্দ দোমিনিক ল্যুমোনগা উনখিবা অদূদা প্রিসো শিমরে অমদি সনা মৈত্রমনা, প্রাইম মিনিষ্টর নরেন্দ্র মোদিনা লুচিংবা নেস্নেল দেমোক্রেতিক এল্লাইন্স (এন দি এ) গী লৈঙাক্না চহী ১২ মপূঙ ফারকপগা মরী লৈননা ফোঙবা,” তুয়েল্ব ইয়র্স ওফ বিস্বাস কে, বিকাস কে, জন-কল্যান কে” হায়বা লাইরিক অমা খূদোল তমখি। লেংয়ান-ফি অমমমসু খূদোল তমখি।
উনখিবা অদুদা মনিপুরদা লৈমিন্নরিবা ফুরুপ কাঙলুপ খুদিংমক নুংশি চাননা লৈনবা, চাওখৎ মায়কৈদা চঙশীনবা ঙম্ননবা, মহৌশাগী শান্তি অমূক হঞ্জিল্লক্নবা মোষ্ট রেবরেন্দ দোমিনিক ল্যুমোন্না তাইবং মপূগী মফমদা থৌনিজখি। চাওখৎ-থৌরাংগী থবকশিং লমদমসিগী খ্বাইদগী শোত্থরবা মফমশিংদসু য়ৌহনবিনবা মহাক্না মখাতানা থৌনিজখি।