মনিপুরগী লৌফম চাদা ৮০ হেন্না লৌ পানবা য়াদ্রে

মালেমগী ঈশীং নুংশিৎ, অঈঙ-অশাগী ফীভমদা শাথীনা অকায়বা লাক্তুনা রিটুগী খোঙচত্তা অকায়বা কয়া লাকপা মরম্না মহৌশাগা য়াম্না মান্নদনা কূমশীগী ওইনা নোংজু পান্থাগী মতম খম থেংনা য়ৌশিল্লক্লবা, নোংজুথা লোইরমদাইফাওবা য়ৌরক্লবা মতমসিদা প্রি-মোন্সুনসু য়ৌরকখিদ্রে অদুগা ষ্টেট অসীদা মোন্সুনসু হৌজিক ফাওবা য়ৌরক্তবনা মরম ওইদুনা মনিপুরগী লৌফম অপূনবগী চাদা ৮০ হেনবদা ঙসী ফাওবা লৌ পানবা য়াদনা লৈরে।

ষ্টেট এগ্ৰিকলচর দিপার্টমেন্টতগী পীরকপা পাউ মতূঙ ইন্না, মনিপুর তম্পাক্কি লৌ উবা য়াবা মফম অসী পূন্না লম ১৮০,০০০ রোম্নি। চীঙগী লমদনা চাউরাক্না লম হেক্তর লিশীং ২০ গী ময়াদনি। চীঙদদি ফৌ থাবগী কলচর অসী অসূম অসুম মাঙশীল্লক্তুনা পোপ্পি পাম্বী থাবদা অয়াম্বনা মা‌য় ওন্সীন্নখ্রে। তম্পাক লমগী লৌ পানবা য়ারবা লৌফমশিংগী চাদা ২০ লোমদমক হৌজিক ফাওবদা লৌ পানবা হৌনখ্রে।

ইন্দিয়াদা সুপর এল নেনোগী অচৌবা চৈথেং অমা মায়োক্নরগনি হায়না অখঙ-অহৈশিংনা য়াম্না ঙন্না ফোঙদোকপসু লৈখ্রবনি।লৌ পালহৌনবা থবক পায়খৎনবগী ৱাখল্লোন সু মনিপুরগী লৌমীশিংদা তপ্না-তপ্না মাঙথরকপগুম তৌরি। দিপার্টমেন্ট ওফ ইনভাইরনমেন্ট এন্দ ক্লাইমেট চেঞ্জনা নোংজুগী চাং অসীগী মতাঙদা হায়, চহী অসীগী জানুয়ারি থাদা মনিপুরদা নোং মরীক অমা ফাওবা তাখিদে।

ফেব্রুয়ারি থাদা এম এম ০.৪৪, মার্চ থাদা এম এম ১৬৪.৬৭, এপ্রিল থাদা ৯৯.৯, মে থাদা এম এম ১৩২.৩৬ খক্তমক নোং চুখি। হৌজিক নোং চুদবা মরম্না মনিপুরগী লৌমীশিং কোক্তা খূৎ হাপ্পগী থাক অমদা লৈরক্লিবসি লৈঙাক্না খন্থবগী মতম য়ৌশিল্লক্লবনি হায়না মীয়াম্না ফোঙদোক্নরক্লি।