প্রাইমারিগী থাক্তা এনভাইরনমেন্ত এৱ্যের্নেসকি সবজেক্ত য়াওহন্নবা হোৎনরি: গোবিন্দাস

মালেমগী মফমশিংদা পাক-সন্না পাঙথোক্নবগুম ঙরাং জূন ৫ দা মনিপুরদসু তোঙান তোঙানবা লূপ অমদি লৈঙাক্কি দিপার্টমেন্টশিং, এজেন্সিশিং অমসুং দিষ্ট্রিক্ট এদমিনিষ্ট্রেসনশিংনা শীন্দুনা ৱার্ল্ড এনভাইরনমেন্ট ডে থৌরমশিং পাঙথোক্নখ্রে।
মপূঙ ওইবা থৌরমদি মনিপুর লৈঙাক্কি হোম মিনিষ্টর গোবিন্দাস কোন্থৌজম্না অথোয়বা মীথূঙলেন ওইদূনা ইম্ফাল ইষ্ট দিষ্ট্রিক্টকি পেলেস কম্পাউন্দদা লৈরিবা সিটি কনভেন্সন সেন্তরদা পাঙথোকখিবা অদুনা ওইখি। মনিপুর লৈঙাক্কি দিরেক্টরেট ওফ এনভাইরনমেন্ট এন্দ ক্লাইমেট চেঞ্জনা শীন্দুনা পাঙথোকখিবা ৱার্ল্দ এনভাইরনমেন্ট ডেগী থৌরমদু মালেম পূম্বগী ওইনা হন্দক্কি চহী অসীগী থম্লিবা থিম, “ইন্সপায়র্দ বাই নেচর ফোর ক্লাইমেট ফোর অৱার নেচর,” হায়বসিদা মপূঙ ওইবা মীৎয়েং থম্লগা চত্থখিবনি।
মহৌশাগী পোৎলমশিং অসী মীওইবা অমদি মালেমদা লৈরিবা অতৈ থৱায় পানবশিংনা হিংবদা তঙায়ফদনা চঙবা অমনি। মহৌশাদগী লৈজরক্লবা পোৎলমশিং অসী য়াওদনা মালেমসিদা থৱায় পানবা অমত্তা হিংবা ঙমদে। নুংশিৎ-নুংশা, মহৌশাগী খল কায়থরকপা, অকোয়বগী ঈশীং-নুংশিৎ মোৎশীল্লক্লিবা থৌওং কয়া অসীনা মরম ওইরগা মালেম অসিদা মীওইবা অমদি অতৈ থৱায় পানবশিংনা মখাতানা হিংবদা খুদোংথীনিঙায় ওইরক্লে।পূম্নমক অসীদগী ঙাকথোক্নবা ঐখো‌য়না ঈশা-ঈশাগী তঙায়ফদ্রবা ইথৌদাংনি খঙনা মহৌশাগী খল ঙাক্তুনা থম্ননবা থবকশিং লৌখৎকদবনি।হীরম অশোমদা মীৎয়েং থম্লগা প্রাইমারি থাক্কি মহৈ তম্বদগী হৌরগা এনভাইরনমেন্ট এৱ্যের্নেস কি মরমদা খঙহন্ননবা অখন্নবা সবজেক্ট অমা য়াওহন্নবা থৌরাং তৌরি হায়না থৌরমদুদা অথোয়বা মীথুংলেন ওইনা শরুক য়ারদুনা ৱা ঙাঙবদা মনিপুর লৈঙাক্কি হোম মিনিষ্টর গোবিন্দাস কোন্থৌজম্না ফোঙদোকখি।