হান্না ভার্তিয়া জনতা পার্তী(বি জে পি) গী ৱার্কর ওইনা লৈরম্বা হৈরোক এসেমব্লি কনস্তিত্যুএন্সিগী মনূঙ চন্না লৈবা নোংপোক লৌরেম্বমদগী মীওই ২৭০ ইন্দিয়ান নেস্নেল কংগ্ৰেস তা য়াওরকখ্রে। ঈমূঙ ৫০ রোমদগী মীওইশিং অদুবু তরাম্না ওকপগী থৌরম অমা, কেন্দ্র অসীগী হান্না এম এল এ ওইরম্বতা নত্তনা মনিপুরগী মিনিষ্টরসু ওইরম্লবা মোইরাংথেম ওকেন্দ্রগী হৈরোক ময়ায় লৈকায়দা লৈবা য়ূমদা, হৌখিবা থাংজা নুমিৎতা পাঙথোকখ্রে।তরাম্না ওকপগী থৌরম অদুদা হৈরোক ব্লোক কোংগ্রেস কম্মিতিগী প্রসিদেন্ট থোকচোম রঞ্জনসু শরূক য়াখি। নৌনা কংগ্ৰেস তা য়াওরকখ্রবা মীওইশিং অদুদা রঞ্জন্না পার্টীগী মার্কা য়েকপা লেংয়ানফি য়ানবিদুনা হরাও-তরাম্বগা লোয়ননা ঈকায়খুম্নবা উৎখি।
থৌরমদুদা ৱা ঙাঙবদা মনিপুর লেজিসলেটিব এসেমব্লিগী হান্নগী এম এল এ মোইরাংথেম ওকেন্দ্রনা হায়, মনিপুরগী চহী অহূম হেল্লক্লবা হীঙশাগী ঈরাঙ অসীগী ৱারোয়শিন অমত্তা পুরকপা ঙমদ্রবা, মপী -মপা য়াওদ্রবা, মানা মানা অনীংবা অপাম্বখক তৌনরক্লিবা ফীভম অসীদা কন্ট্রোল তৌবা ঙমদ্রবা, মমীৎ তাঙলবা, মনা পঙলবা, মখোঙ-মখূৎ পুন্সিন্দুনা থম্বগা চপ মান্নরবা মনিপুরগী বি জে পি লৈঙাক অসীদগী মীয়াম্না করিগুম্বা মখল অমত্তগী আসা তৌনিংঙায় লৈত্রে হায়বা খঙবদগী মীওই কয়া ঙসীদি আই এন সিদা চঙলকপা লেপত্রি।
মনিপুরগী ঈরাং লাকশীনবা ঙমগদবা পার্টিদি কংগ্ৰেস খক্তনি হায়বা খঙলক্তুনা নৌনা পার্টি অসীদা য়াওরক্লিবা পূম্নমক তরাম্না ওক্লি হায়বা ৱাফম ওকেন্দ্রনা থমখি। হৈরোক অসী অথূবা মতমদা বি জে পি অমসুং এন পি পি মুক্ত কেন্দ্র অমা ওইরগনি হায়না মহাক্না মখা তানা ফোঙদোকখি।