মনিপুর লৈঙাক্না কাংপোকপি দিষ্ট্রিক্টকী মনূঙচন্না লৈরিবা সিনাই সূ দেজিগনেটেদ কেম্প থিংজিন্দুনা সি আর পি এফ কি কোব্রা য়ুনিট থমজিনখিবা অসী কুকি -জো কম্যুনিটিবু হন্থনা য়েংবা মতৌনি হায়না কুকি-জো কাউন্সিল কে জেট সিনা লৈঙাক্তা অকনবা মওংদা কন্দেম তৌরক্লি।
মনিপুর লৈঙাক্না মীচঙ-মীখায় নাইনা চত্থরিবা থৌওংশিং অসী লেপতবা তায়বদি সেন্টরগী মীৎয়েং চিংশিল্লগনি। মদুদসু সেন্টরনা তুমিন্না লৈখিবা তারবদি কুকি -জো মীয়ামগী মশাগী ওইবা ৱারেপ অমা লৌরগনি হায়না কুকিশিংগী অপূনবা বোদী অসীনা অকনবা ৱার্নিং তৌখ্রে।
কুকি -জো কাঙলূপকি মীওই শিবা নত্রগা শোকপা মতমদা লৈঙাক অসিনা রেসক্যু ওপরেসন চত্থনবা পূক্নিং চঙনা হোৎনদে। তৌদে হায়খিনি হায়বগী মওংদা য়াম্না তন্না থবক তৌরি অদুগা মৈতৈ অমসুং নাগা কাঙলূপকি মীওইশিং শোকপা নত্রগা শিবা য়াওরবদি লৈঙাক অসিনা য়াম্না থুনা, নংহৌররোই মতাগুম বোম্বিং ওপরেসন চত্থদুনা কুকিশিং ক্রেকদাউন তৌনবা হোৎনৈ হায়রি। লৈঙাক অসীনা চত্থরিবা এন্টি কুকি-জো এক্টিভিটিশিং অসী লেপ্তবা তারবদি ফূরূপ অসীনা মশাগী ওইবা তোঙানবা ৱারেপ অমা লৌরগনি হায়নসু অকনবা ৱাফম থম্লক্লি।
মসিগী শরূক অমা ওইনা লৈঙাক অসিদা য়াওরিবা কুকি-জো কাঙলূপকি এম এল এশিং কৌথোকপা য়াওনা সূ দা লৈরিবা কূকি নহারোলশিংনা লৈঙাক্তা মতেং পাংলিবসি তোক্লকপা য়াই হায়রি।
