মনিপুর লৈঙাক্কী দিষ্ট্রিক্ট হেন্দলুম এন্দ টেক্সটাইল্স, ইম্ফাল ইষ্ট না ওক্টোবর থা অসীগী ২৪ দগী ইবোয়াইমা শুমাঙ লীলা শঙলেন, ইম্ফালদা পাঙথোক্লকখিবা চহী অসিগী মেরা হৌ চোংবা ফেষ্টিব ফ্যের,২০২৬ অদূ ঙরাং মপূঙ ফানা লোইশিনখ্রে।
নুমিৎ তরেৎনি চূপ্না চত্থরকখিবা ফেষ্টিব ফ্যের অদুদা দিরেক্টরেট ওফ হেন্দলুম এন্দ টেক্সটাইল্স গী দিপ্যুটি দিরেক্তর (হেন্দলূম), টি ঐচ বসন্তনা অথোয়বা মীথূঙলেন, দিষ্ট্রিক্ট হেন্দলুম এন্দ টেক্সটাইল্স, ইম্ফাল ইষ্ট কি প্রোজেক্ট মেনেজর (হেন্দলুম) ফিজম কাংজাম্বা মৈতৈনা থৌরম মপূ ওইনা শরূক য়াখি।
দিপ্যুটি দিরেক্তর বসন্তনা হায়, মনিপুরগী চীঙ-তমগী মফম কয়াদগী লাকপা ফিশাবি অমসুং আর্টিসানশিংবু অপূনবা প্লেটফোর্ম অমদা পুরক্তুনা মখল-মখা কয়াগী কান্নবশিং লৌমীন্নবগী পান্দমদা পাঙথোকখিবা ফেষ্টিব ফ্যের অসীদা পূন্না ষ্টোল ৪২ হাংদুনা মীয়ামদা হেন্দলুম অমসুং হেন্দিক্রাফকী পোত্থোকশিং ফংহনখি। লূপা লাখ ১.৫ হেন্না য়োনবা ঙম্বা ষ্টোলশিং য়াওখি।
মায় পাক্না পাঙথোকখিবা ফ্যের অসীদা হেন্দলুম অমসুং হেন্দিক্রাফকা, মেরা হৌ চোংবগা, অনীগী মরক্তা লৈনরিবা মরী গী মতাঙদা খন্ন-নৈনবগী থৌরমসু পাঙথোকখি হায়বা ৱাফম মহাক্না থমখি।
