২৫ শুবা “দি গ্ৰেট জূন অপরাইজিং এন্দ য়ুনিটি দে” থৌরমদা মীয়াম্না মপূঙ ফানা শরুক য়াবিয়ু: ধিরেন

হৌখিবা কুমশিং ২০০১ গী জূন ১৪ দা, মতমদূগী সেন্টর লৈঙাক অমসুং এন এস সি এন- আই এম অনীগী মরক্তা, থাইলেন্দগী কোনুং বেঙ্কোক্তা সাইন তৌনখিবা সিজফায়র এগ্ৰিমেন্ট অমদা “ৱিদাউথ টেরিটোরিয়ল লিমিট্স” হায়বা ফ্রেজ অমা য়াওশীল্লকখি।
মদূনা মরম ওইদুনা মনিপুরগী টেরিটোরি‌য়ল ইন্টিগ্ৰিটিদা অকায়বা পীরকপা য়াবা ফীভম অমা লাকহনখিবা অদূবু কন্না য়ানিংদবা ফোঙদোক্লদুনা মীয়াম্না হৌনরুবা লৈতনা লৈঙাক্কি মায়োক্তা সিভিল ৱার অমগী মতৌগুম হৌরকখিবা ঈহৌদা, চহী অদূমক্কি জূন ১৮ দা থৱায়না পোন্থা পীখ্রবা অথৌবা-অথৌবীশিং অদূবু নীংশীংদুনা য়ূ সি এম অমসুং অমুকোনা খূৎশম্নদুনা, মীয়ামগা লোয়ননা চহী খূদিংগী ইম্ফালগী কেক্রুপাত্তা লৈরিবা অথৌবশিংগী খুভমদা হৈ-লৈ কত্তুনা, মখোয়বু নীংশিংদুনা অমসুং ঈকায়খুম্নবা উত্তুনা লাক্লি।
চৎলিবা চহী অসীগী ওইনসু লাক্লিবা জূন ১৮ দা মহৌশাগুম থৌরম পাঙথোক্নবা লূপ অনী অসীনা মপূঙ ফানা শেম-শাবা লোইরে, লৈখিদ্রবা অথৌবশিংগী খুভমদা হৈ-লৈ কত্তুনা ইকাইখুম্নবা ঊৎকদৌরিবা থৌরম অসীদা ইরৈচাশিংনা মপূঙফানা শরূক য়াবিয়ু হায়না য়ুনাইটেদ কম্মিটি মনিপুর (য়ু সি এম) গী কনভিনর ৱাই কে ধিরেন্না মনিপুরগী মীয়ামদা অপীল তৌরক্লি।
ঙরাং ইম্ফালগী ক্বাকৈথেলদা লৈবা ওল মনিপুর য়ুনাইটেদ ক্লব্স ওর্গানাইজেসন (অমুকো) গী ময়ায় লোয়শঙদা পাঙথোকখিবা পাউমীশিংগা উনবগী থৌরমদা ধিরেন্না আপিল অসী তৌখিবনি।
হন্দক্কি থৌরম অসী হেন্না ফজনা অমসুং মপূঙফানা পাঙথোক্নবগীদমক মহাক মশামক্না লুচিংবা ওর্গানাইজিং কম্মিটি অমসু শেম্লে হায়না মহাক্না ফোঙদোকখি।