ব্রিটিসনা কংলা খূদূম চনখিববু ঈপসা না অমম্বা নুমিৎ হায়না পালন থৌরম পাঙথোকখ্রে

অদূঙৈ কুমশিং ১৮৯১ গী এপ্রিল ২৩ দা খোংজোম লানফমদা ব্রিটিশ লান্মীশিংগী মখূত্তা মনিপুরনা মায়থীরদুনা এঙ্গলো-মনিপুরি ৱার লোইশিনখ্রবা মতূঙ, এপ্রিল থা অদূমক্কি চৈচৎ ২৭ তা মনিপুরগী কোনুং ওইরমখিবা কংলাদা ব্রিটিশ লান্মীশিংনা চঙশীল্লক্তুনা মখোয়গী য়ুনিয়ন জেক ফীরাল চিংখত্তুনা পাইহনখিবা নুমীৎ অদূবু “অমম্বা নুমিৎ” হায়না খঙনদুনা চহী খূদীঙগী ইন্টরনেসনেল পিছ এন্দ সোসিএল এদভান্সমেন্ট (ঈপসা) না ওবজার্ব তৌদুনা লাকপগুম ঙরাংসু এপ্রিল ২৭ তা লূপ অসীনা অমম্বা নুমিৎ কি থৌরম, ইম্ফালগী কংলা পার্ক মনাক্তা লৈরিবা মনিপুর প্রেস ক্লব তা পাঙথোকখ্রে।
ক্লব অসীগী লোক্তাক হোলদা পাঙথোকখিবা থৌরমদুদা ঈপসাগী প্রসিদেন্ট মাইবম বিষেশ্বরনা হায়, খা-নোংপোক এসিয়াদা চহী লীশীং অনী হেন্না মনীঙ তম্বা, নিংথৌ পানবা লৈবাক অমা ওইনা লৈরকখিবা কংলৈপাক্কি পাফল য়েকপা ফীরাল অদূ কুমশীং ১৮৯১ গী এপ্রিল ২৭ তা ব্রিটিশ লান্মীশিংনা চিংথদুনা মখোয়গী অনৌবা য়ুনিয়ন জেক ফীরালনা মহূৎ শিনখিবগা লোয়ননা মনিপুরগী নিংতম্বগী নুমিৎ তাবা হায়বদু ওইখিবনি।
ঐখোয় মনিপুরগী য়েলহৌমীশিংগী ওইনদি ‌মদূ অমম্বা নুমিৎ অমনি, লমদমসিগী পুৱারিদা অমুক কাউবা লৈররোই দবা নুমিৎনি। নুমিৎ তাবা লৈতে হায়নরিবা, মতমদুগী ব্রিটিশ কি মশীং থীঙমদ্রবা, খূৎলায় মতীক চানা পায়রবা লান্মীশিংগা থৌনা ফনা মায়োক্নখিবা ঐখোয়গী ঈপা-ঈপূশিং অদুনা মায়থীরগনি অমসুং লানফমদুদা শোয়দনা শিরগনি হায়বা খঙলবসু হনবা নাইদবা থৌনাগা লোয়ননা লান্থেংনরম্লগা মরৈবাক্কিদমক নোক্না নোক্না থৱায় কৎখিবনি হায়না বিষেশ্বরনা থমখি।
ঈপা-ঈপূশিং অদূগী চারোল-শূরোল ওইরিবা ঐখোয়না ঈরমদমগী অপূনবা শক্তম ঙাক্তুনা তুংগী মীরোলদা লেঙদ্রবা মনিপুর অমা খূৎশীন্নরম্নবা পূন্না হোৎনমিন্নিসি হায়খি।