চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ অমা মখায়রোম তারকপা মতমদা বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিংনা বোম কাপশিন্দুনা পীক্লিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অদূগী মতাঙদা পেন্নদ্রবা অমসুং খোয়রাঙ-খোয়শাওনরবা লমদম অদোমগী মীয়াম্না চঙশীল্লকখিবা ঈহৌদা, গেলমোন দা লৈবা সি আর পি এফকি পোষ্ট তগী পার্সনেলশিংনা নোংমৈ কাপথোরকপদা লৈখিদ্রবা মীওই অহূমগী হকচাং ঙসী অরোয়বা মথৌ মঙম পাঙথোক্তুনা লৈরোল চল্লগনি হায়রি।
লৈখিদ্রবা মীচম অহূম অদু ঙসী ফাওবা মীরেলশঙদা থম্লকখিবনি। মখোয়গী অরোয়বা মথৌ-মঙম পাঙথোক্কদৌরিবা অসিদা লমদম অসীগী ঈরৈচাশিংনা শরূক য়াবিয়ু হায়না লৈখিদ্রবশিংগী ঈমূঙ মনূঙগী মায়কৈদগী মরী লৈনবা পূম্নমক্তা পাউজেল্লক্লি।