মালেমগী ফুটবোল মশান্নগী খ্বাইদগী চাউরবা ফীফা মেন্স ৱার্ল্ড কপকি ২৩ শুবা এক্সত্রাভেগেঞ্জা-২০২৬ , হন্দক্কি ওইনা লৈবাক ৪৮ না শরূক য়াদুনা, লাক্লিবা জূন ১১ দগী জুলাই ১৯ ফাওবা,য়ূনাইটেদ ষ্টেট্স,কানাদা অমসুং মেক্সিকোনা পূন্না য়ূম্বূ ওইদুনা পাঙথোক্লগনি।
পনবা য়াই, ফীফা রেঙ্কিংদা য়ূম্ফম ওইরগা টিম ৪৮ বু গ্ৰূপ ১২ থোক্না খায়দোক্তুনা, গ্ৰুপ অমমমদা টিম ৪/৪ না শরূক য়াদুনা চত্থগদবনি। টুর্নামেন্ট অসীগী অহৌবা নুমিৎ, জূন ১১ দা য়ূম্বূ মেক্সিকোনা মসীগী সীটি দা লৈবা ইষ্টাদিও এজদেকা ষ্টেদিয়মদা সাউথ আফ্রিকাগা মায়োক্নদুনা শান্নরগনি।
টুর্ণামেন্ট অসীগী গ্ৰূপ ১২ দা য়াওরিবা লৈবাকশিংদি গ্ৰূপ এদা মেক্সিকো, সাউথ আফ্রিকা, সাউথ কোরিয়া অমদি জেক রিপব্লিক নি। গ্ৰূপ বিদনা কানাদা,বোস্নিয়া এন্দ হর্জগোবিনা,কটার অমদি স্বিটজরলেন্দনি।গ্ৰূপ সী দা ব্রাজিল, মোরোক্কো, হায়টি অমদি স্কোটলেন্দ নি।গ্ৰূপ দিদা য়ুনাইটেদ ষ্টেট্স,পরাগুৱে,অষ্ট্রেলিয়া অমদি টর্কি নি। গ্ৰূপ ইদা জর্মনি,কুরাকাউ, আইবোরি কোষ্ট অমদি ইক্বেদরনি। গ্ৰূপ এফতা নেদরলেন্দস, জাপান, স্বিদেন অমদি তুনিসিয়ানি। গ্ৰূপ জিদা বেলজিয়ম,ইজিপ্ত,ইরান অমদি ন্যু জিলেন্দ নি। গ্ৰূপ ঐচতা স্পেইন, কেপ ভর্দি সাউদি অরাবিয়া অমদি উরুগ্বেনি। গ্ৰূপ আইদা ফ্রান্স,সিনেগাল,ইরাক অমসুং নোরৱেনি।গ্ৰূপ জেদা দিফেন্দিং চেম্পিয়ন আর্জেন্টিনা,অলজেরিয়া, অষ্ট্রিয়া অমদি জোর্দান নি। গ্ৰূপ কেদা পোর্টুগাল,দি আর কোঙ্গো,উজবেকিষ্টান অমসুং কলম্বিয়ানি।গ্ৰূপ এলদা ইংলেন্দ,ক্রোয়েসিয়া,ঘানা অমদি পানামানি।
