নোংচুপথংবা আফ্রিকাগী লৈবাক অমা ওইনা লৈরিবা মালি দা ইলেক্ট্রিফিকেসন প্রোজেক্ট অমদা থবক তৌদুনা লৈবা ইন্দিয়া মচা ৫ শকখঙদবা, খূৎলায় মতীকচানা পায়রবা লালহৌবা কাঙবূ অমনা কিদনেপ তৌখ্রে হায়না পাউগী লীখূন অমনা খঙহল্লক্লি। ইন্দিয়ানশিং অদূ কম্পনি অমগী মখাদা থবক শূদুনা লৈরকখিবনি হায়রি।
মালি হায়রিবা আফ্রিকাগী লৈবাক অসী হৌখিবা কুমশিং ২০২০ অমসুং ২০২১ দা থংন – থংননা মিলিটরি জুন্টানা অনীরক কূ তৌদুনা লৈঙাক -সাসন পায়শীনখিবদগী লৈবাক ঈরাঙ হৌদুনা লাক্লিবনি।সেক্যুরিটিগী ফীভম খম থেংনা শোকচীল্লক্লিবা লমদম অমা ওইরি।অল কাইদা অমদি মখল -মখা কয়াগী খূৎলায় পায়বা লালহৌবশিংনা পাক -সন্না,মনীং তম্না মীওৎ -মীনৈ চত্থদুনা লৈরি অদুগা হুরান -চীন্থী,লুট -পাৎকি থৌদোকশিং নুমিৎ খূদীঙগী মশীঙ লাকঙমদনা থোক্লিবা লৈবাক অমসু ওইরি।
নোংমা কাংদনা মীহাৎ -মীপুন অমদি তমথিরবা অতৈ ক্রাইম কয়ামরুম চত্থদুনা লৈরিবা মফম অমা হায়বদু ওইরিবনি। ইন্দিয়ান ৫ কিদনেপ তৌখিবা অদূগী মতাঙদা হৌজিকমক্কি ওইনা কনাগুম্বা লালহৌলূপ অমত্তনা ক্লেইম তৌরকপসু লৈত্রি।