চৎলিবা নবেম্বর থা অসীগী মনূঙদা মনিপুরদা মীয়ামগী লৈঙাক অমা শেমহৌদ্রবদি মীয়াম অসী খ্বাইদগী অৱাবা মায়োক্নখ্রগনি।বি জে পিগী ওইনসু অফবা ওইরক্কদবা মান্দে।মরম অদুনা নবেম্বর থা অসীগী মনূঙদা মনিপুর লেজিসলেটিব এসেমব্লিগী স্পীকর থোকচোম শৈত্যব্রত্তবু বি জে পি লেজিসলেচর পার্টীগী লিদর ওইনা খল্লবা মতূঙদা মীয়ামগী অপাম্বা মশক খঙনা পোপ্যুলর গভর্নমেন্ট অমা শেম্লগে হায়না ক্লেইম তৌরগনি হায়না এম এল এ লৌরেম্বম রামেশ্বরনা ফোঙদোকখ্রে।
কৈরাউ কেন্দ্রদগী বি জে পিগী এম এল এ অসীনা ঙরাং পাউমীশিংদা ৱাফম অসী ফোঙদোরকখিবনি।সস্পেন্দেদ এনিমেসন হান্না লৌথোক্ট্রিঙৈ চৈরক্তা মতৌ করম্না মীয়ামগী লৈঙাক শেমজরো হায়দুনা গভর্নরনা অয়াবা পীরক্কদৌরিবনো হায়বদু মহাক্কি ৱাফম অসীদা নৈননিঙায়দি ওইরি।
হৌজিক মনিপুরদা লৈঙাক্কি মপূ পান্দ্রে।শেল লৈরবসু চাওখৎ -থৌরাংগী থবক অমত্তা পায়খত্তনা লৈরি।লম্বী -থোং লৌখৎপা য়াদনা ফীভম শোকচীনখ্রে।মায়কৈ খূদীঙদা অৱাৎপনা পীক থনখ্রে।ময়াঙনা লৈঙাক পায়রবনিনা লমদমসিগী মীয়ামগী পূক্নীঙগী ঈহুল মশক খঙনা থবক তৌবসু লৈত্রে।মরম অদুনা অথূবা মতমদা পোপ্যুলর গভর্নমেন্ট অমা শেম্লগে হায়না ক্লেইম তৌরগনি হায়না রামেশ্বরনা পাউমীশিংদা ফোঙদোকখি।
