ঈশীঙ -নুংশিৎ শেংদবগী চাং ৱাংখৎলকপা থিংদুনা মীওইবগী পুন্সি কলহৌনবা সুপ্রিম কোর্টতা পি আই এল ফাইল তৌরকখ্রে

লৈবাক অসিগী মফম অয়াম্বদা ঈশিং – নুংশিৎ শেংদবগী চাং কা হেন্না ৱাংখৎলক্লিবসিনা মরম ওইদুনা মীওইবগী হকশেলদা য়াম্না চাউনা চৈথেং পীরক্লিবা অসী লৈঙাক্না খূদক্তা অকনবা মীৎয়েং চঙদুনা এয়র পোল্যুসন হন্থহন্নবা অখন্নবা থৌরাং পায়খৎহনবিয়ু হায়না ল্যুক খ্রিষ্টোফর কোতিনহো কৌবা সোসিয়েল এক্টিভিষ্ট অমনা সুপ্রিম কোর্টতা পব্লিক ইন্টরেষ্ট লিটিগেসন (পি আই এল) অমা ফাইল তৌখ্রে। মহাক্কি পি আই এল অদুদা ফোঙদোক্লিবা মরুওইবা ৱাফমশিংগী মনূঙদা, লৈবাক অসীগী অয়াম্বা মফমদা লৈরিবা অকোয়বগী ঈশীং -নুংশিৎ অসী খুদোংথিবা থাক্কি মথক্তা লৈরে হায়বসি অখঙ -অহৈশিংনা ফোঙদোকখিবা লৈখ্রে।

হৌজিক হৌজিকমক্কি ফীভম য়েংলবসু দিল্লি,কোলকত্তা,চেন্নাই,মুম্বাই,বেঙ্গলুরুনচিংবা মেট্রোপোলিটান সিতিশিংদা লৈরিবা ঈশীঙ -নুংশিৎকি মওং মতৌ অসী কা হেন্না মোৎশীনখ্রে।চহী খূদিংগী সহরশিং অসীগী অকোয়বদা ফংলিবা নুংশিত্তা য়াওবা পার্টিক্যুলেট মেট্টর (পি এম) অসী ১০ য়ৌবা য়াওরে।ফীভম অসীদি মীওইবগী হকশেলদা খ্বাইদগী খুদোংথীনিঙায় ওইরক্লে লোয়ননা লায়না -লাইওং কয়ামরুম থোকহল্লকপা য়াই হায়বসিনি। কুমণশিং ২০২১ দা ৱার্ল্ড হেল্থ ওরগানাইজেসন(দব্লিয়ু ঐচ ও) না ফোঙদোরকখিবগী মতূঙ ইন্না নুংশিত্তা পি এম ১০ য়ৌনা য়াওরকপা তারবদি মীওইবগী হকশেলদা ‌য়াম্না চাউনা খুদোংথীনিঙা‌ ওই হা‌য়রি।

মরম অদূনা লৈবাক অসীগী মফম পূম্নমক্তা পব্লিক হেল্থ ইমর্জেন্সি লাউথোকপগা লোয়ননা এয়র পোল্যুসন হন্থহন্নবা অখন্নবা থৌরাং পায়খৎহনবিয়ু হায়খি।চহী খূদীঙগী দিল্লি,নেস্নেল কেপিটেল রিজন (এন সি আর) অমসুং অকোয়বা মফমশিংদা মৈখূ থাদোকপগী চাং অসী য়াম্না ৱাংলি।মসীগী মরূওইবা মরমদি লৌরোক মতূঙদা চরূনচিংবা অরেমখাকশিং পাক -সন্না মৈ থাদোকপা অমসুং নোং য়াম্না লীক্না তাবননি।মসী কোকহন্ননবা অখন্নবা থৌরাং পায়খৎহনবিয়ু হায়খি।