ইম্ফাল নবেম্বর ০৬: নেস্নেল হায়ৱেশিংদা গারী চত্থোক -চৎশীন তৌবদা মীওই কাঙলূপ অমনা মতম কয়াগী মমাঙদগী অথীংবা থম্লকখিবা কয়া অসীনা মরম ওইরগা মনিপুরগী মীয়াম্না ষ্টেট অসীগী মপান্দা লৈবা লৈবাক্কি অতৈ মফমশিংদা চত্থোক -চৎশীন তৌবদা মরুওইবা ট্রান্সপোর্টেসনগী পাম্বৈ অসী নোংথক্কি লম্বীদা এরোপ্লেন তোংদুনা চৎপা অসী নত্তনা অতৈ পাম্বৈ লৈত্রি।চৈরকশিদা মহৌশা উরান স্কিমগী মখাদা সার্বিস তৌরম্বা এয়র ইন্দিয়া এক্সপ্রেসকী ফ্লাইট পূম্নমক পাইবা লেপখ্রবা মতূঙদা লেমহৌরিবা ফ্লাইট এজেন্সিশিংনা পেসেঞ্জরশিংদগী লৌনিং -লৌনীংবা মওংদা ফ্লাইটকি অতোংমল লৌদুনা মমল কা হেন্না ৱাংখৎখিবনা মরম ওইদুনা মনিপুরগী মীয়ামদা কা হেন্না খুদোং চাদবা,অৱাবা মায়োক্নদুনা লৈরিবনি।
ফীভম অসী য়েংলগা থা অসীগী অহূমদা খূরায় কেন্দ্রগী এম এল এ লৈশাংথেম সুসিন্দ্রোনা মিনিষ্ট্রি ওফ সিভিল এভিয়েসনগী সেক্রেটরি সমির কুমার সিনহাগা উনদুনা খুদোংচাদবা ফীভমশিং অসীগী মতাঙদা ৱারী শাদুনা খঙহনখিবগা লোয়ননা ইম্ফাল গুৱাহাটি অমসুং ইম্ফাল কোলকত্তাগী মরক্তা সার্বিস তৌরিবা ফ্লাইট মশীঙ হেঙ্গৎপিননবা অমসুং ফ্লাইটশিংগী অতোঙমল কা হেন্না ৱাংখৎলক্লিবসিগী মতাংদা মীৎয়েঙ চঙবীদুনা হন্থহন্নবা তকশীনখ্রে।
মদূগী ফল ওইনা ঙরাং অয়ূক সিভিল এভিয়েসনগী সেক্রেটরি অসিনা এম এল এ সুসিন্দ্রোদা ফোন তৌরকপগা লোয়ননা ইম্ফাল টু কোলকত্তা অমসুং ইম্ফাল টু গুৱাহাটি দা সার্বিস তৌননবা ফ্লাইট অনী মখাতানা হাপকত্তুনা হেঙ্গৎহল্লগনি হায়না খঙহল্লকখ্রে হায়না এম এল এ সুসিন্দ্রোনা ফোঙদোরক্লি। ফ্লাইট মশীঙ হেঙ্গৎপগী মথক্তা ইম্ফাল -গুৱাহাটিগী মরক্তা লৈরিবা ফ্লাইটশিংগী অতোঙমলসু য়াম্লবদা লূপা লীশীং তরেৎতগী হেল্লরোই হায়না খঙহল্লকখ্রে হায়রি।
