চৎলিবা সেপ্তেম্বর থা অসীগী ১৯ গী নুংথিল পূঙ ৫.৩০ রোম তারকপদা বিষ্ণুপুর দিষ্ট্রিক্টকি মনূঙচন্না লৈরিবা নম্বোল সাবল লৈকায়দা ৩৩ শুবা আসাম রাইফলসকি কনভোই অমদা শকখঙদবশিংনা এম্বুস তৌদুনা এ আরগী নাইব সুবেদার অমা য়াওনা এ আরগী পার্সনেল ২ শিহনখিবা অমসুং অতৈ এ আরগী পার্সনেল ৫ বু শাথীনা অশোক- অপন নংহনখিবা থৌদোক্তুদা হকথেংননা চেন্নবনি হায়বা পি এল এগী এক্টিভ কাদর অমা ফাগৎপা ঙমখ্রে।
অকক্নবা ইনফোর্মেসন অমা লাকপদগী এ আরগী ৩৩ শুবা য়ুনিটকি টিম, বিষ্ণুপুর দিষ্ট্রিক্ট পুলিস অমসুং ইম্ফাল নোংচূপ পানাগী পুলিস টিম লোয়ননা অতৈ সেক্যুরিটি ফোর্সকি কম্বাইন টিম অমনা ঙরাং ইম্ফাল নোংচূপ পানাগী কামেং এরিয়াদা অখন্নবা ওপরেসন অমা চত্থবদা পিপলস লিবরেসন আর্মী (পি এল এ) গী এক্টিভ কাদর অমা ফাগৎপা ঙমখ্রে। কামেং এরিয়াদা লালহৌবনি চিংনবা মীওই খরা চত্থোক- চৎশীন তৌরে হায়বা পাউ অমদা য়ূম্ফম ওইদুনা ঙরাং নুংথিল পূঙ ১ রোম তারকপদা চত্থখিবা অখন্নবা ওপরেসন অদূদা ইম্ফাল নোংচূপ পানাগী মনূঙচন্না লৈরিবা অৱাং- লৈকিন্থবী অৱাং লৈকায়দগী খোমদ্রাম ওজিৎ সিংহ এলাইজ কৈলাল (৪৭), অপোকপা লৈখিদ্রবা কে ঐচ মনি হায়রিবা মীওই অসী ফাগৎপা ঙমখি।
মহাকপু ইন্টরোগেসন চত্থবদা নম্বোল সাবল লৈকায়দা ৩৩ শুবা আসাম রাইফলসকি কনভোই অমদা এম্বুস তৌখিবদুদা মহাক মশামক হকথেংননা চেন্নৈ হায়দোকচরকখি হায়রি। মহাক্না ফোঙদোরকপদগী লোক্তাক পাৎকি মফমশিংদগী অফবা মখলগী ওটোমেটিক রাইফল কয়ামরুম ফাগৎখি। নোংমৈ মরূ কয়াসু ফাগৎপা ঙমখ্রে। হৌজিক মহাক্কি মচীন হংবগী অকনবা থবক চত্থরি হায়না মনিপুর পুলিস হেদ ক্বার্টর্সতগী ফংবা পাউদা ফোঙদোরক্লি।