বিষ্ণুপুর দিষ্ট্রিক্টকি মোইরাং পুলিস ষ্টেসনগী মনূঙচন্না লৈরিবা ত্রোংলাউবি অৱাং লৈকায়দগী সলাম কিপগেন (৪৭) অপোকপা এস মঙ্গি কৌবা মীওই অমা ঙরাং অয়ূক অঙনবদা বিষ্ণুপুর দিষ্ট্রিক্টকি পুলিসনা ফাদুনা পুখি হায়বা ৱাহৌদগী লৈকায়গী মীয়াম থোক্নরক্তুনা ইম্ফাল-চুরাচান্দপুর লম্বী থিংখিবদগী মীয়ামগী মহৌশাগী পুন্সিদা চাউনা খুদোংচাদবা মায়োক্নহনখ্রে।
পুলিসনা ফাজীনখিবা কিপগেন মরাল লৈজদবা, নোংমগী শু-নোমদুনা চারা তাঞ্জরগা চম্না হিংজরিবা মীওইনি হায়না খুঞ্জাশিংনা ফোঙদোকখি। লৈকায় অদূগী মৈরা পায়বীশিংনা দিষ্ট্রিক্ট পুলিস হেদক্বার্টরদা থোমজীল্লকখিবগা লোয়ননা কন্দিসন অমত্তা য়াওদনা কিপগেনবু খূদক্তা থাদোক্কদবনি হায়বা অকনবা দিমান্দ তৌখি।
কাইনথংদা মীয়াম অদূগী মরক্তগী মীওই খরখক খনগত্তুনা দিষ্ট্রিক্ট পুলিসকি এস পিগা উনহনখি। এসপিগা ৱারী শান্নরিঙৈ চৈরক্তুদা লম্বী থিংবগী খোঙজঙসু ঙাইহাক কোমথোকখি। হৌজিক ফাওবগী ওইনদি কিপগেন থাদোরকখিবগী পাউ চপচানা ফংবা ঙমদ্রি।