বি জে পিগী এল এ চপচানা, মশীঙ শুনা লৈরবসু মীয়ামগী লৈঙাক শেম্বা ঙমদবসি য়াম্না ঈকায়নিঙাইনি : তোম্বি

চৎলিবা ফেব্রুয়ারি থা অসীগী ৯ দা মনিপুরগী চিফ মিনিষ্টর নোংথোম্বম বিরেন্না মশাগী অপাম্বা- অনীঙবগী মতূঙ ইন্না নত্রগা সেন্টরগী লুচিংবশিংগী ইন্সট্রক্সন অমগী মখাদা চিফ মিনিষ্টর ফমদগী রিজাইন তৌখ্রবা মতূঙ নুমিৎ মরিনি লৈরগা ফেব্রুয়ারি ১৩ গী নুমিদাংৱাইরমদগী প্রসিদেন্ট রুল মনিপুরদা থমজিল্লকখ্রে। অদূম ওইনমক হৌজিক রুলিং ভার্টিয়া জনতা পার্টিগী এম এল এ মশীঙ চপচানা, মপূঙফানা লৈরি। মশীঙ শুনা লৈজরবসু হৌজিক ফাওবা মীয়ামগী লৈঙাক অমা শেম্বা ঙমজদবা হায়বসি খ্বায়দগী ঈকায়নিঙায় ওইরি হায়না শিবা সেনা মনিপুর য়ুনিটকি প্রসিদেন্ট দা. মোইরাংথেম তোম্বীনা ফোঙদোকখ্রে।

কংগ্রেস পার্টিনা মনিপুরদা প্রসিদেন্ট রুল থম্ননবা হঞ্জিন হঞ্জিন লাউদুনা লাকখি। কুকি- জো কাঙলূপ্নসু ষ্টেট অসিদা পি আর থম্লকপদা হরাওবা নুঙাইবা ফোঙদোক্তুনা জগোয় ফাওবা শাদুনা অপেনবা ফোঙদোকখি। হৌজিক্তি মীয়ামগী সাসন লৈত্রবা মতমসিদা লমদম অসীগী মীয়াম খম থেংনা অৱাবা কয়া অমদি খুদোংচাদবশিং মায়োক্নরক্লবনিনা কংগ্রেস পার্টিগী অপেনবা হায়বদু খম থেংলম্লগনি হায়না তোম্বীনা য়ানীঙদবা, পেন্দবা উৎখি।শিবা সেনা পার্টিদি মীয়ামগী লান্মিনি, ইন্দিয়ানা চিন-কুকি মিলিটেন্টশিং খূৎনেক তৌদুনা মনিপুরগী অপূনবা শক্তম থুগাইনবা হোৎনরিবসি কৈদৌনুংদা য়াবা ঙম্লোই অদুগা শিবা সেনা লৈরিমখৈ মনিপুর মচেৎ তাহনবসু য়ারোই হায়না মহাক্না ফোঙদোকখি।

মশাগী লমখৈগা কোন্ননা ময়েক শেংনা ইন্দিয়াগী ফীবান্নুংদা তিনখিবনি, মনিপুরগী লমখৈ ইন্দিয়াদগী নিরগা লৌখিবা নত্তে, ইন্দিয়ানা পীবীরকখিবসু নত্তে হায়না তোম্বীনা শেংদোকখি।