মনিপুর লৈঙাক্কি মখাদা লৈরিবা ষ্টেট পুলিশ, সেন্ট্রেল আর্ম পুলিশ ফোর্স, আসাম রাইফলস/ আর্মিগী অপূনবা খূৎপু অমনা থবক পায়খৎমিন্নগদবা ইন্টিগ্রেটেড এন্টি- এক্সটোর্সন সেল অমা লিংখৎলে। সেল অসী ষ্টেট লৈঙাক্কি হোম দিপার্টমেন্ট কি মখাদা থবক তৌগনি হায়না মনিপুর লৈঙাক্কি চিফ সেক্রেটরি প্রসান্ট কুমারনা ফোঙদোরকখ্রে।সেল অসী চয়োল অমদা নুংতি নুমিৎ খূদিংগী পূঙ ২৪ মথৌ তৌগনি হায়রি। মসীগী টোল ফ্রী নম্বরনা ১৮০০-২০২-৩৩২৬ নি। অন্দরগ্ৰাউন্দ ওরগনাইজেসন কয়ানা সধারন মীয়াম অমসুং লৈঙাক্কি ওফিসিয়েল কয়াদা ঙাইহাক লৈতনা পুবা-থাংবা ঙম্লোইদবা মওংদা অচৌবা শেনফমশিং কিহন-খংহন্দুনা দিমান্দ তৌবা হেঙ্গৎলক্লিবা অসীনা মরম ওইদুনা মীয়ামগী পুন্সি অমসুং লন- ঙাক শেন্ননবগীদমক খোঙথাঙ অসী লৈঙাক্না লৌখৎলকপনি হায়না চিফ সেক্রেটরিনা ফোঙদোরক্লি।
শকখঙদবা খূৎলায় পায়বা ওরগনাইজেসন কয়ানা সধারন মীয়াম, লন্নাই মীওইশিং অমসুং লৈঙাক্কি ওফিসিয়েলশিংদা মেসেজ, লেট্টরশিং, টেলিফোন কোলনচিংবা তৌরক্তুনা এক্সটোর্সনগী দিমান্দ কয়ামরুম তৌরকপা, অদূগা মদূ পীদ্রবদি হাৎকনি, ফাগনি হায়বা কিহন-খংহন্দুনা খঙহল্লকপা কয়াদগী তঙায়ফদনা ষ্টেট লৈঙাক্কি মায়কৈদগী থৌরাং অসী লৌখৎলকপনি হায়রক্লি।
অসীগুম্বা থৌওংশিং অসিনা মনিপুরগী লো এন্দ ওর্দরদা অকনবা চৈফূ অমা পীরক্লি। খুদোংথীনিঙায় ওইবা অরাপ্পা মফমশিংদা মীয়াম্না চৎথোকপিগনু হায়না খঙহল্লকপগা লোয়ননা অকি-অখং পীরক্লবদি টোল ফ্রী নম্বর অসীদা খূদক্তা কোল তৌবিরকউ হায়রি।