অদূঙৈ থায়না মনিপুরদা নিংথৌ পাল্লিঙৈ মতমদা মনিপুরগী অরিবা খূৎই লাইরিকশিং, পুয়াশিং কৌখত্তুনা খোমগৎলবা মতূঙদা কংলা উত্রা মমাঙদা পৈখৎলগা পুল্লপ মৈ থাদোক্তুনা মাঙহনখিবা থৌদোক অদুগী চহী ২৯৬ শুরকপা নীংশীং থৌরম পাঙথোক্কদৌরিবা অসীগী মাঙওইননা থা অসীগী ২০ দা লমদম অসিদা লৈরিবা তোঙান তোঙানবা মহৈলোয়শঙশিংদা লৈরিবা মহৈরোয়শিংনা অমুবা বেজ থেত্তুনা ব্লেক দে ওবজার্বেসন থৌরম পাঙথোকখ্রে।
মপূঙ ওইবা থৌরম অদূ ইম্ফাল নোংচুপ পানাগী মনূঙ চন্না লৈরিবা শগোলবন্দ তাকয়েল কোলোম লৈকায়দা লৈবা কিন্দরগার্টেন মোন্টেশ্বরি স্কুলদা পাঙথোকখি হায়না থৌরমদূবু শীনখিবা ইন্টর্নেস্নেল ওবজার্বেসন কম্মিটি ওন পুয়া মৈথাবা (ইকোপ) গী কো-কনভিনরনা থাদোরকপা ষ্টেটমেন্ট অমদা ফোঙদোরক্লি। পুয়া মৈ থাখিবগী অৱাবা ফোঙদোক্তুনা মচু তরেৎকি ফিরাল তঙ্খাইদা চিংথদুনা থমখি। থা অসীগী ২০ দগী হৌরগা ঙসী জানুয়ারি ২২ ফাওবা নুমিৎ হুম্নি চূপ্না ব্লেক দেগী থৌরম পাঙথোক্তুনা অৱাবা ফোঙদোক্লি।
হৌদোকখিবা থৌরম অদুদা কিন্দরগার্টেন মোন্টেশ্বরি স্কুলগী প্রিন্সিপাল দা.এল ধনেস্বর, ইন্টর্নেস্নেল ওবজার্বেসন কম্মিটি ওন পুয়া মৈথাবা গী কনভিনর মোইরাংথেম নাউখম্বা, ৱাখল্লোন মান্নবা অপূনবা কংলৈপাক্কি ভাইস প্রসিদেন্ট দা. ৱাইখোম গোপেন মৈতৈনা মরুওইবা মীথূংলেনশিং ওইনা শরুক য়াখি। নাউখম্বনা মহৈরোয়শিংদা অমুবা বেজ থেত্তুনা ব্লেক দে থৌরম অদূ হৌদোকখি।