অদুঙৈ ইং কুমশিং ১৯৭২ গী জানুয়ারি ২১ দা মনিপুরনা ইন্দিয়াগী ১৯ শুবা ষ্টেট অমা ওইখিবা ঐতিহাসিক ওইরবা নুমিৎ অদুবু নীঙশিংদুনা ঙরাং ষ্টেট লৈঙাক অসীগী মায়কৈদগী ষ্টেটহুদ দেগী থৌরম ইম্ফালগী অহানবা মনিপুর রাইফলস পেরেদ গ্ৰাউন্দ দা পাঙথোকখ্রে। চিফ মিনিষ্টর নোংথোম্বম বিরেন্না অথোয়বা মীথূংলেন ওইদুনা পাঙথোকপা থৌরম অদুদা মিনিষ্টর অমসুং এম এল এ শিংসু শরুক য়াখি। চিফ মিনিষ্টরনা থৌরম অদুদা হায়, বি জে পিনা লুচিংবা সেন্তর অমসুং ষ্টেট লৈঙাকনা মনিপুরদা মহৌশাগী ঈঙ-তপ্পা শক্তম হঞ্জিলহন্ননবা অকনবা থবক পায়খৎলি। হৌজিক লৈরিবা হীঙশাগী ঈরাং অসী তপ্না-তপ্না ফীভম ফগৎলক্লি।
লাঞ্জেন্নরবা ঈমূঙশিংগী অৱাবা, খুদোংচাদবশিং কোকহন্দুনা মশা-মশাগী হান্নগী মফমশিংদা হঞ্জিলহন্ননবা লৈঙাকনা থবক পায়খৎপা লেপত্রি হায়খ্রে। চাওখৎ- থৌরাংগা মরী লৈনবা থবক থৌরমশিংদা পোলিটিক্স তৌবিগনু হায়না মহাক্না ফোঙদোকখি। ইম্ফাল রিভর প্রোজেক্ট কি মখাদা লূপা ক্রোর ৮০ চঙনা নম্বুল রিভর রিজুভনেসন প্রোজেক্ট, গ্ৰেটর ইম্ফাল রিং রোদ অমসুং ইম্ফাল কনক্রিট রোদ প্রোজেক্ট লূপা ক্রোর ৩০০ চঙনা পায়খৎনবা শেম-শাবা লোইরে হায়না চিফ মিনিষ্টরনা ফোঙদোকখি।
মিনিষ্টরশিং-হৈখাম দিঙ্গো, টি ঐচ বসন্ত কুমার, গোভিন্দাস কোন্থৌজম, লৈশাংথেম শুশিন্দ্রো অমসুং দা. সাপম রঞ্জননচিংবা য়াওনা শরূক য়াখিবা ষ্টেটহুদ দেগী থৌরম অদুদা এম এল এ শিং থাংজম অরুনকুমার, থৌনাউজম শ্যামকুমারসু শরুক য়াখি। সেনাপতি, উখ্রূল, তমেংলোং, চান্দেলদসু সি টি স্কেন, এম আর আইগী ফেসিলিটি লৈরবা হোস্পিটালশিং শাননবা ক্রোর ১০০ কাইথোক্লগনি হায়না চিফ মিনিষ্টরনা ফোঙদোকখি।