গভর্নর অজয় কুমার ভাল্লানা চ্যের লৌদুনা সেক্যুরিটি রিভ্যু মিটিং পাঙথোকখ্রে, লান্না লমজিংখ্রবা নহারোলশিংদা থবক ফংহন্ননবা ৱাফম থমখ্রে

হৌখিবা ইরাই নুমিত্তা মনিপুরগী অনৌবা গভর্নর ওইনা ৱাশক লৌদুনা থবক পায়বা হৌখ্রবা অজয় কুমার ভাল্লানা চ্যের লৌদুনা ঙরাং রাজ ভবনদা সেক্যুরিটি রিভ্যু মিটিং অমা পাঙথোকখ্রে। মদুদা সি আর পি এফ, আসাম রাইফলস, বি এস এফ অমদি মনিপুর পুলিসকি মকোকথোংবা ওফিসিয়েলশিং শরুক য়াখি। ষ্টেট অসীগী সেক্যুরিটি এদভাইজর কুলদিপ সিংহ অমসুং দিরেক্তর জেনরেল ওফ পুলিস রাজিব সিংহসু মিটিং অদুদা শরুক য়াখি। য়ুনিফাইদ কম্মান্দ গী ওইবা মীফম অদুদা মনিপুরগী চিফ মিনিষ্টরদি য়াওখিদ্রে। মীফম অদুদা গভর্নর অজয় কুমার ভাল্লানা হায়, খুন্নাইদা হীংশা থোকহন্ননবা হোৎনরিবা লমহেন-তুহেনবা মীওইশিং অথূবদা ফাগত্তুনা নেস্নেল সেক্যুরিটি এক্ট( এন এস এ),১৯৮০ গী মখাদা চহী অমা বিচার অমত্তা চত্থদনা জেলদা নমশীন্দুনা থম্ননবা মনিপুর পুলিসনা মথৌ তাবা অকনবা থবকশিং লৌখৎকদবনি।

লমদম অসীদা লান্না লমজিংখ্রবা নহারোলশিং খুন্নাইগী মহৌশাগী পুন্সিরোলদা পুরক্ননবা অমদি মখোয়বু ঈঙনা-চীক্না খুন্দা লৈতাহন্ননবা থবক্কি খুদোংচাবা পীগদবনি।সেন্ট্রেল অমসুং ষ্টেট সেক্যুরিটি পার্সনেলশিং লৌরকপদা ওইরবসু, লান্না লমজীঙবিরুরবা নহারোলশিং অসীদা অহেনবা খুদোংচাবা ফংহনগদবনি হায়খি। সি আর পি এফ, আসাম রাইফলস অমদি বি এস এফকি মায়কৈদগী মনিপুরদা মৈতৈ কাঙলূপকি খ্বায়দগী অরীবা লালহৌলূপ অমা ওইরিবা য়ু এন এল এফ পাম্বৈ ফেক্সন্না লৈঙাক্কা য়ানরদুনা খূৎয়েক পীনখ্রবা শিজফায়র এগ্ৰিমেন্ট গী গ্ৰাউন্দ রুলশিংগী ৱাংমদা থবক তৌরি হায়না পেন্দবা ৱাফমশিং মিটিং অদুদা থমখি। পাম্বৈ ফেক্সন অসী কুমশিং ২০২৩ গী নবেম্বর ২৯দা য়ুনিয়ন হোম মিনিষ্ট্রি অমদি মনিপুর লৈঙাক অনীগা শিজফায়র এগ্ৰিমেন্ট সাইন তৌনখিবনি।

মসিগী কাদর ৮০ রোম খূৎশু-খূৎলায় ৩১ গা কোন্ননা লৈঙাক্তা সরেন্দর তৌরকখিবনি। নাকল অমরোমদা, ইম্ফাল ইষ্ট দিষ্ট্রিক্ট কি য়াইঙংপোকপি এরিয়াগী কুকি অমসুং মৈতৈ ফূরুপশিংনা খুন্দারিবা মফমশিংদা হৌখিবা কুমশিং ২০২৪ গী দিসেম্বর ২৪ দগী ঙসীফাওবদা কুকি মিলিটেন্ট শিংনা কাইহৌরকপদগী নোংমৈ কাপ্নবগী থৌদোক ৫০ রক হেন্না থোকখ্রবনি।