প্রাইম মিনিষ্টর মোদিনা ফোরেন্দা চৎলগা খৎনবা খাম্ননবা হোৎনরি, মশাগী ময়ূমদা চাক্লিবা মৈজাওদি মূত্থৎনবা হোৎনদ্রি :দেবব্রত্ত

মনিপুরদা থা ১৫ হেল্লক্লবা অকনবা হীংশাগী ঈরাং অসীনা মরম ওইদূনা মীওই ৩০০ লোম শিহনখিবগী মথক্তা মীওই লীশীং হেন্না অশোক- অপন মায়োক্নরগা লৈরি। কুকি- মিলিটেন্টশিংনা মৈতৈগী য়ূম লীশীং তরারোম মৈনা তুম্না থোদোকখিবদগী হৌজিক মনিপুরদা তোঙান তোঙানবা রিলিফ কেম্প অমসুং প্রি-ফেব্রিকেটেদ হোমশিংদা চঙজফম লৌদুনা, মশা-মশাগী ময়ূমশিংদা হঞ্জিনবা ঙম্নদনা  অৱাবা খাঙদুনা মীওই লীশীং ৬০ হেন্না লৈনরি। চৈরকশিদা হৌজিকসু নোংমা কাংদনা কুকি- মিলিটেন্টশিংনা মৈতৈ মীয়ামদা দ্রোন বোম্বিং এত্তেক, স্নাইপর এত্তেক, রোকেট প্রোপেল্ড বোম্বিং এত্তেক কয়ামরুম চত্থরক্তুনা মীচম মীয়ামদা অকনবা হীংশাগী এত্তেক চত্থরক্তুনা মীওই কয়া নৌনা হাৎপা হৌরক্লি।মোদিনা করিগুম্বা ৱাফম অমত্তা ফোঙদোক্ট্রি হায়না ইন্দিয়া ব্লোক্না ফোঙদোকখ্রে।

থৌওংশিং অসী মীরৈবাক্কি খূৎ য়াওরগা লৈবাক অসীগী সেক্যুরিটিদা অকিবা পীরক্তুনা লান্দারকপনি হায়বসি খঙনা-খঙনা মোদিনা খঙশীন্নদনা ঙসীফাওবা মনিপুরদা নোংমা ফাওবা লাকপগী মহুত্তা মীরৈবাকশিংদা কোয়বা চত্তুনা ফোরেন্নরশিং খৎনবা খাম্ননবা হোৎনদুনা লৈথোক্লি। মনিপুর অসী ইন্দিয়াগী শরুক অমা ওইনা মহাক্না উবা ঙমদ্রি হায়না ইন্দিয়া ব্লোক্কি মহূৎ শিল্লদুনা মনিপুর প্রদেস কংগ্রেস কম্মিটি (এম পি সি সি) গী ৱার্কিং প্রসিদেন্ট কে ঐচ দেবব্রত্ত না ফোঙদোকখিবনি। মনিপুরদা থোক্লিবা, থা ১৫ হেল্লক্লবা হীংশাগী ঈরাং অসী ষ্টেট অসীগী ঈচম চম্বা ইস্যু অমা ওইনা লৌরম্বদু হৌজিক্কি ওইরক্লিবা ফীভম অসীনা য়ারক্ট্রে। নেস্নেল ইস্যু ওইনা পুখৎনবা ইন্দিয়া ব্লোক্না অকনবা থবক পায়খৎপা হৌরে হায়নসু মহাক্না ফোঙদোকখি।

প্রাইম মিনিষ্টর মোদিনা মনিপুরদা হৌরকখিবা ঈরাং অসীগা মরী লৈননা ঙসীফাওবদা ৱাফম অমত্তা ফোঙদোক্ট্রি, মনিপুরদা খোঙ্গূল অমত্তা তারদ্রি। অমরোমদনা, য়ুক্রেন-রসিয়াগী খৎনরিবা, লান তৌনরিবা অসীবুদি গ্যান য়াম্না লৈবা, শান্তি পামজবা লুচিংবা অমগী শক্লোন লৌদুনা খামজিন্ননবা ঙাইহাক লৈতনা ৱা ঙাঙলি। সোমদনা মীরৈবাক্তগী লোন্না লান্দারক্তুনা মশাগী ময়ূম মৈনা তুম্না থাবা হৌরক্লি হায়না দেবব্রত্ত না থমখি। মসী ময়ামসী নেস্নেল অমসুং ইন্টর্নেস্নেল ইস্যু অমা ওইনা পুখৎনবা ইন্দিয়া ব্লোক্না অকনবা মওংদা থৌরাং পায়খৎলক্লি হায়না দেবব্রত্তনা ফোঙদোকখি।