ঙরাং অয়ূক পূং ৬.৪০ রোম তাবদা থৌবাল দিষ্ট্রিক্টকি হৈরোক পুলিস ষ্টেসন্না কোনবা শলুংফম ময়ায় লৈকায়দা লৈবা মীওই অমগী য়ূমগী গেত্তা শকখঙদবশিংনা বোম অমা য়ান্সিন্দুনা থম্লম্লে। লৈকায় অদুদা লৈবা থাংজম চন্দ্রকুমার, অপোকপা অপীক কৌবা মীওই অসীগী য়ূমগী গেত্তা বোম য়াল্লগা থমজিল্লম্বা অদূদা ঈমূং-মনূংগী মীওইশিংনা খঙনরকপদগী খূদক্তা হৈরোক পুলিসতা পাউ পীরবা মতূংদা পুলিসকি বোম এক্সপার্ট টিম চঙশীল্লক্তুনা অশোয়- অঙাম অমত্তা য়াওহন্দনা দিস্পোজ তৌখি।
নাকল অমরোমদা, ঙরাং অয়ূক ইম্ফাল ৱেষ্ট দিষ্ট্রিক্টকি কৈশামথোং হোদাম লৈরক্তা লৈবা আর কে শিটলজিৎ কৌবা মীওই অমগী য়ূমদা খূৎলায় পায়বা শকখঙদবশিংনা নোংমৈ রাউন্দ খরা কাপশীন্দুনা এত্তেক চত্থরম্লে। থৌদোক অদুদা মী শোকপা নত্রগা শিবগী পাউদি লৈতে।
মী য়াম্না কূঙনা তারিবা লৈকায়দা নোংমৈ- বোম কাপশীন্দুনা অকি অখঙ থোকহল্লম্বা থৌওং অদূবু য়ানিংদবা ফোঙদোক্তুনা লৈকায় অসীগী মৈরা পায়বী ঈমাশিংনা হোদাম লৈরক্তা ৱাকৎ মীফম পাঙথোকখি। মনিপুর পুলিসনা মফম অদুদা লাক্তুনা ফীভম য়েংশিনখিবগা লোয়ননা থিজিনবা হৌখ্রে হায়রি।