য়ূথ কংগ্ৰেসকি থৌমীশিংনা চিফ মিনিষ্টর তূমদূনা লৈরগনু, হৌগৎলো হায়দুনা সি এমগী গেট থীন্দুনা লাউশিনখ্রে

মনিপুরদা কুকি মিলিটেন্টশিংনা নূপী -অঙাঙ খাক্তনা মীচম কয়া পাক্তক্ননা, নোংমৈ অমসুং বোম কাপশীন্দুনা, খাই – খাইদুনা হাৎলক্লবা মতমসিদা ফমূঙদা নুঙাইনা তূমদুনা লৈবা মতমদু ওইদ্রে। ঐখোয়সু নোংমদি শিরগদবা লৈরে।হৌজিক হাৎতোকপিরবসু য়ারে।বি জে পিগী লৈঙাক অসীগী মখাদা ঐখোয়গী মীয়াম অসী হৌজিক হোরেন তম্বা ঙমদবা ফীভমদা লৈরে হায়না য়াম্না কন্না পেন্দবা ফোঙদোক্লদুনা মনিপুর প্রদেস কংগ্ৰেস কম্মিটিগী মখাদা লৈরিবা য়ূথ কংগ্ৰেসকি মশীঙ য়াম্লবা থৌমীশিংনা হৌখিবা থাঙজা নুমিৎকি অয়ূক্তা চিফ মিনিষ্টর সেক্রেটরিয়েৎকি গেট থীন্দুনা, সি এম তূমদূনা লৈরনু, তূম্বা হৌগৎলো হায়না লাউশিনখ্রে।

য়ূথ কংগ্ৰেসকি মশীং য়াম্লবা থৌমীশিং অদুনা ঈখঙ খঙহৌদনা অয়ূক অঙনবা মতমদা চিফ মিনিষ্টরগী সেক্রেটরিয়েট মমাঙদা চঙশীল্লক্লগা চিফ মিনিষ্টর লৈরিবা মফমদূগী গেট থীন্দুনা চিফ মিনিষ্টর তূমদূনা লৈগনু, হৌজিক তূম্বগী মতম নত্তে, মীচম কয়া কুকি মিলিটেন্টশিংনা ফাজীন্দুনা থমখিবদগী মফম খঙদনা লৈরি, নূপী অঙাঙ খাক্তনা মিলিটেন্টশিং অসীনা হাৎপা লেপত্রি, অসীগুম্বা তাঞ্জা অসীদা করিগী চিফ মিনিষ্টর তূমদুনা লৈরিবনো হায়বা খোল্লাউশিংগা লোয়ননা কংগ্ৰেসকি য়ূথ লীদরশিং অদূনা সি এম সেক্রেটয়েটকি গেট থীনবা হৌরকখিবনি।

মফম অদূদা দ্যুটি তাদুনা লৈরম্বা মনিপুর পুলিসকি পার্সনেলশিংনা মীয়াম অদুবু চঙহন্দনবা হোৎনখি অদূবু মশীং য়াম্লবা কংগ্ৰেসকি থৌমীশিং অদুনা অথীংবদু নমখায়রবা মতূঙদা সি এমগী গেট অদূ থীনবা হৌরকখিবনি। বি জে পি লৈঙাক্কি মখাদা হিংলিবা ঐখোয়গী মীয়াম অসীগী পুন্সি তম্বা ঙমদবা ফীভমদা লৈরে। দাউন-দাউন বিজেপি হা‌য়বা খোল্লাউ কয়াসু থৌমীশিং অদুনা লাউখি। মমৈথঙদা মনিপুর পুলিসকি ওফিসারশিং য়াওনা থোমজীল্লক্তুনা কংগ্ৰেসকি থৌমীশিং অদূ তকথোক্তুনা ঈরাং অদূ লাকশীনখি।