মনিপুরগী শক্তম থুগাইনবা হোৎনরক্লিবা য়েলহৌমী নত্তবশিং মরূ ফূক্তৎলগা মাঙহনখ্রসি: এম এল এ রাধেশ্যাম

ঈরমদম মনিপুরগী য়েলহৌমীশিংদা তেমশীংনরক্তুনা ঐখোয়গী ঈং-তপ্পা শক্তম অমসুং শান্তি থুগাইনবা অমদি লমদম অসীগী অপূনবা শক্তম মচেৎ তানা থুগাইনবা হোৎনরক্লিবা, য়েলহৌমী নত্তবশিং অসী মরূ ফংনা মাঙহন্নবা পূন্না হোৎনমিন্নিসি হায়না হীয়াংলম কেন্দ্রগী এম এল এ দা. য়ূম্নাম রাধেশ্যাম্না মীয়ামদা ফোঙদোকখ্রে।

ৱিমেন দেভেলপমেন্ট স্পোর্টিং কম্মিটি,লাংমৈদোং মনীং মখা লৈকায়না শীন্দুনা পাঙথোকপা কম্মিটি অসীগী অহানবা ফাউন্দেসন দে থৌরমদা অথোয়বা মীথূঙলেন ওইনা শরূক য়াখিবা এম এল এ রাধেশ্যাম্না ৱাফম অসী ফোঙদোকখিবনি।থৌরম অদূ য়ূথ গাইদেন্স ক্লব, লাংমৈদোং মনীং মখা লৈকায়গী মীপূন শঙদা পাঙথোকখি। থৌরমদুদা,মনিপুর পব্লিক সার্বিস কম্মিসন্না লৌবা মনিপুর সিভিল সার্বিসেস কম্বাইন কম্পিটিটিব ইগজামিনেসন,২০২২ দা মায় পাক্লকখ্রবা অমদি বোসেম অমসুং কোহসেম্না লৌবা, হন্দক ফল লাউথোকখ্রবা ক্লাস টেন অমসুং তুয়েল্ব ইগজামিনেসনদা মায় পাক্লকখ্রবা কেন্দিদেটশিংবুসু তরাম্না ওক্তুনা অচম্বা খূদোলপোৎ তমদুনা পূক্নিং থৌগৎখি।

থৌরমদুদা এম এল এ রাধেশ্যাম্না মখা তানা হায়, শান্তি লৈত্রবা মফমদা নুঙাই-য়াইফবা, চাওখৎপা কৈদৌনুংদা ওইথোক্লোই।মপান্দগী আইন কায়না নারোন্দা চঙশীল্লকপা মীতোপ-মীয়ানচা কয়ানা য়েলহৌমী ঐখোয়গী লম মুন্দুনা লৌননবা, মনিপুরগী অপূনবা শক্তম মচেৎ তানা থুগাইনবা হোৎনরক্তুনা লমদম অসীদা মীহাৎ-মীপূনগী থবকশিং পাক-সন্না চত্থরক্লি। মীতোপশিং অসী ঐখোয় পূন্না হোৎনমিন্নদুনা মরূ ফংনা মূত্থত্রিমখৈ লমদমসিদা চাওখৎপা, নুঙাই-য়াইফবা অমসুং শান্তি পুরকপা ঙমখিরোই হায়না মহাক্না ফোঙদোকখি।