ৱাখল তামিন্নবনা ঈরাং অসীগী ৱারোয়শিন পুরকপা ঙমগনি: ইবোবি

মনিপুরদা হৌখিবা কুমশিং ২০২৩ গী মে অহুমদগী হৌরকখিবা মৈতৈ-কুকি কম্যুনিটি অনীগী মরক্তা থোক্লিবা হীঙশাগী ঈরাঙ অসী লোইশিলহন্দ্রিবা ফাওবা মীয়াম অসী ঈংনা, নুঙাইনা পুন্সি লেনবা হায়বদু ওইথোক্লোই। কুকি মিলিটেন্টশিংনা নাগা ফূরূপকি মথক্তা অমদি অতৈ ফূরূপশিংগী মীচম কয়াদসু মথঙ মথঙ এত্তেক চত্থরক্তুনা মীওই কয়ামরুম হাৎপা হৌরক্লিবা কয়া অসী খঙনা-খঙনা হীঙশাগী ঈরাং অসী লোইশিন্ননবা পাম্বৈ পুথোক্তুনা থবক পায়খৎপগী মহুত্তা বি জে পিনা ইলেক্সন্দা মায় ওন্সীন্দুনা লৈরিবসি য়াম্না লাইবক থীবনি হায়না এম পি সি সীগী প্রসিদেন্ট ওইনা লৈরিবা থৌবাল কেন্দ্রগী এম এল এ ওক্রম ইবোবিনা পেন্দবা ফোঙদোকখ্রে।

ঙরাং বি টি রোদতা লৈবা কংগ্ৰেস ভবন্দা পাংথোকপা পাউমীশিংগা উনবগী থৌরমদা মহাক্না ৱাফম অসী ফোঙদোকখিবনি। মহাক্না হায়, ঐখোয়গী ঈরমদম অসিদা থোক্লিবা হীঙশাগী ঈরাঙ অসী ঐখোয় কাঙলূপশিংগী মরক্তা ৱাখল তামিন্নবা অমগা লোয়ননা ফম্মিন্নদুনা ৱারী শান্নদুনা ৱারোয়শিন পুরক্নবা হোৎনগদবনি, লম্মন খুম্নবনা ৱাথোক অমত্তগী ৱারোয়শিন পুরকপা ঙম্লাই। হৌজিক করি থোক্লগদগে, হোরেন করি ওইগনি হায়বা তম্বা ঙমদবা ফীভমদা লৈরিবা মনিপুরদা দিপ্লোই তৌরম্বা সেক্যুরিটি ফোর্স পার্সনেল কম্পনি কয়ামরুম ৱেষ্ট বেঙ্গলগী মীখলদা শীজীন্ননবা কৌথোকখিবদগী মীশী-মীনা থোকপগী চাং ৱাংখৎলক্লে হায়খি।

ৱেষ্ট বেঙ্গলদা বি জে পিনা লৈঙাক পায়হৌদবা য়াদে হায়বসিদা বি জে পিনা কোক থাদদুনা লৈরি অদূগা মনিপুরগী ঈরাং অসি লোইশিলহন্ননবা থৌশিলদি অমত্তা পায়খত্রি। কোটজিম অমদি কোটলেন অনীগী লোন্নবদা এম্বুস তৌরক্তুনা মীওই অহুম নৌনা অমুক হাৎখ্রে, মীওই মঙা অশোক-অপন নংহল্লে। চীরূ ফূরূপকি মীচম অমসু জৌজাংটেক্তা এত্তেক চত্থরকপদা লৈখিদ্রে।পূম্নমক অসী বি জে পিনা থৌশাদবা, করম্না লৈঙাক সাসন তৌগনি খঙদবননি হায়খি।