ট্রোংলাউবি থৌদোক্কি জে এ সিগা সি এমগা উনদুনা ৱাফমশিং খন্নখ্রে, কেবিনেট মীফম পাঙথোকখ্রে

চৎলিবা এপ্রিল থা অসীগী তরেৎকি অহীঙ নোংয়াই মতূঙ পূঙ অমা মখায়রোম তারকপা মতমদা বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিংনা বোম কাপশীন্দূনা নৌরিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অমসুং নুমিৎ অদূমক্তদা মীয়াম্না চঙশীল্লকখিবা পেন্দবগী ঈহৌদা, ট্রোংলাউবী খুঙ্গংগী মনাক্তা লৈরিবা সি আর পি এফ কেম্পতগী নোংমৈ কাপথোরকপদা মীওই অহূম শিখিবা, মীওই কয়ানা অশোক-অপন মায়োক্নদুনা হোস্পিটালদা লায়কন্নখিবা অদূগী মতাঙদা শেমখিবা জে এ সিগী লুচিংবশিংগা চিফ মিনিষ্টর য়ূম্নাম খেমচান্দ গা ঙরাং নুংথিল পূঙ ৩ লোম তাবদা সি এম সেক্রেটরিয়েত্তা উনখ্রে।

থৌদোক অদূ য়াম্না লাইবক থীবা অমনি, চেন্নরিবা মীওইশিং ফাগৎকনি লোয়ননা মখোয়গী মথক্তা আইনগী চপচাবা অকনবা থবক লৌখত্তুনা অকনবা চৈরাক ফংহন্নবা হোৎনগনি হায়না চিফ মিনিষ্টরনা জে এ সিগী কাঙবূ অদূদা থাজবা পীখি। থৌদোক অদূগী মতাঙদা চিফ মিনিষ্টরনা থম্মোয় শোক্না নুঙাইতবা ফোঙদোকখি।অঙাঙ অনী তমথীনা, মীনুংশি লৈতনা হাৎখিবা থৌদোক অদূগী মতাঙদা নেস্নেল ইনভেষ্টিগেসন এজেন্সিনা অকনবা মওংদা ইনভেষ্টিগেসন চত্থবা হৌরে।মরাল লৈবশিং শোয়দনা ফাগৎকনি অদূগা লৈখিদ্রবশিংগী ঈমূঙ -মনূঙ অমসুং মীয়ামদা লৈঙাক্কি মায়কৈদগী জষ্টিস শোয়দনমক ফংহনগনি হায়না চিফ মিনিষ্টরনা অচেৎপা থাজবা পীখি।

উনখিবা অদুদা ষ্টেট লৈঙাক্কি হোম মিনিষ্টর গোবিন্দাস কোন্থৌজম, থাঙ্গা এসেমব্লী কন্সটিট্যুয়ন্সিগী এম এল এ তোংব্রম রোবিন্দ্রো অমদি মোইরাং এসেমব্লী কন্সটিট্যুয়ন্সিগী এম এল এ থোঙাম শান্তিসু শরূক য়াখি। লাইবক থীবা থৌদোক অদুগী মতুংদা মীয়ামনা হৌজিক মফম কয়াদা পাক-শন্না চঙশীল্লক্লিবা খোঙজঙশিং অসীগা মরী লৈননা ওইরক্লিবা ষ্টেট অসীগী লো এন্দ ওর্দরগী মতাঙদা খন্ননবা ঙরাং নুমিদাংৱাইরম পূং ৫ তাবদা ষ্টেট লৈঙাক্কি কেবিনেট মীফম অমসু চিফ মিনিষ্টরনা চ্যের লৌদুনা পাঙথোকখি।