থাজনদবশিং ৱারী শান্নদুনা ৱাখল তামিন্নবগী তঙায়ফদবা লৈ, ঈং-তপ্পা শক্তম হঞ্জিল্লক্নবা হোৎনমিন্নসি: খেমচান্দ

মনিপুরদা হৌজিক উবা ফংলিবা হীঙশাগী ঈরাং অসিনা মরম ওইরগা কাঙলূপশিংগী মরক্তা থাজনদবগী চাং ৱাংনা লৈরি। থাজনদবশিং অসী কোকহন্ননবা পূন্না ৱাখল তামিন্নবা, ফম্মিন্নদুনা ঈঙনা-তপ্না ৱারী শানদুনা ৱারোয়শিন পুরক্নবা হোৎনবগী তঙায়ফদবা লৈরি।ঐখোয় কাঙলূপ মশেল মরক্তা থাজনদবা, য়েংথীনবগী থৌওংশিং অসী লোইশিন্ননবা অকনবা খোঙথাং ষ্টেট লৈঙাক্না লৌখৎলি হায়না চিফ মিনিষ্টর য়ূম্নাম খেমচান্দ না ফোঙদোকখ্রে। ঐখোয় মশেল মরক্তা মতম কুইনা মূক্নদুনা, হাৎন-শুনদুনা অসুম লৈরবদি মীতোপ্না খূৎলিংবা খুন্নাই অমা ওইখ্রগনি। মতমদুদা ঐখোয় অমত্তা ঈরমদম অসীদা লৈররোই, ঐখোয়গী কাঙখূল মূৎখিগনি। চাওখৎপসু ঙম্লরোই অদূগা তুংগী মীরোলনা ঐখোয়বু ফজনা শোন্নবিরোই হায়না চিফ মিনিষ্টরনা ফোঙদোকখি।

ঙরাং মহাক্কি ট্রষ্ট বিল্ডিং মিসন অমা ওইনা ঊখ্রূল দিষ্ট্রিক্ট হেদক্বার্তরদা চত্তুনা, মফম অদুদা লৈবা মিনি সেক্রেটরিয়েট কি হোলদা মীয়াম্না মহাকপু হরাও -তরাম্না ওকখিবা থৌরমদা ৱা ঙাঙবদা ৱাফম অসি চিফ মিনিষ্টরনা ফোঙদোকখিবনি।ঊখ্রূলগী তোঙান তোঙানবা খুলশিংদগী লাকখিবা মীহূৎশিং, সিভিল সোসাইটি ওর্গানাইজেসনশীং, মহৈরোয় লূপশিংনা শরূক য়াদুনা পাঙথোকপা থৌরমদুদা চিফ মিনিষ্টরনা মীয়ামগী ৱাকৎশিং মুন্না তারবা মতূঙদা মীয়াম্না পাম্লিবশিং অদূ মহাক্না ইম্ফাল য়ৌরবা মতূঙদা থবক্তা ওন্থোক্নবা হোৎনগনি হায়বা ৱাফম ফোঙদোকখি।

মহাক্না সিরূই ভিল্লেজদা চত্তুনা সিরুই লিল্লি ফেষ্টিবেল পাঙথোক্নবা শেম-শারিবশিং অদুসু য়েংশিনখি। চিফ মিনিষ্টরনা কুকি অমসুং তাঙ্খুল কম্যুনিটি অনীমক্কি তোঙান তোঙানবা খুলশিংদসু চঙদুনা মীয়ামগা অৱা-নুঙাইগী ৱারী শানখি। মখোয়গী ৱাকৎ কয়াসু তাবিবগা লোয়ননা মখোয়গী অৱাবশিং কোকহন্ননবা থবক পায়খৎকনি হায়না থাজবা পীরমখি। থৱাই কুকি খুলগী মীয়াম্নসু চিফ মিনিষ্টরবু হরাও-তরাম্না ওকখি।