রোদ সেফটি মন্থ কেম্পেইনগী শরুক অমা ওইনা ইম্ফাল ৱেষ্ট ট্রাফিক পুলিশ ৱিং অমদি ইম্ফাল ৱেষ্ট দিষ্ট্রিক্ট পুলিস অনীনা খূৎশম্নরগা চত্থরকখিবা রোদ সেফটি দ্রাইবকি মখা তারকপা খোঙথাং ওইনা ঙরাং খ্বাইরম্বন্দ কৈথেলগী আলু গলি লম্বীদা মখোল কা হেন্না হৌহল্লগা নহারোলশিংনা থৌরকখিবা টু হ্বিলর গারিশিংদগী ফাগৎলকখিবা সাইলেন্সর পাইপ ২০৮ রোদ রোল্লরনা তকখায়দুনা মাঙহনখ্রে।
মতৌ অসূম্না হৌরক্লিবা নহারোলশিংনা কান্নদবদা কা হেন্না মখোল হৌবা খোঞ্জেল থাদোক্তুনা মশাগী ঙাইহাককি থ্রীল্লিং মোদ অমদা গারি মচাশিং থৌদোক-থৌজিন তৌদুনা চৎপা অসিনা খুন্নাই অসীগী মীয়ামদা, মরূওইনা অহল ওইরবা মীয়ামদা কা হেন্না নুঙাইতবা, অরাঙবা, খোয়রাঙ-খোয়শাওনবা ফাওহল্লি অদুগা মখোয়গী হকশেলদসু অকায়বা কয়ামরুম থোকহল্লি হায়না ঙসীগী রোদ সেফটি দ্রাইব অদূদা শরুক য়াখিবা ইম্ফাল ৱেষ্ট দিষ্ট্রিক্ট পুলিসকি এস পি ওইনা লৈরিবা সিবকান্তনা ফোঙদোকখি।
লম্বীগী মতাইদা লৈরিবা, মীয়াম চৎনরিবা ফুট পাৎশিংগী স্লেব মথক্তা দুকান্দারশিংনা পোৎ-চৈ য়োন্সিন্দুনা সধারন মীয়ামগী চত্থোক-চৎশীন তৌবদা অপনবা, খুদোংচাদবশিং থোকহনবা য়ারোই, অকনবা আইনগী এক্সন লৌখৎলগনি হায়না এস পিনা ফোঙদোকখি।