সেন্তরগী থৌওং অসীদি মনিপুরি ঐখোয়সে ইন্দিয়ান ওইদ্রবরা হায়বগী চিংনবা লৈরক্লে: কোকোমি

মনিপুর লৈঙাক্কি লুচিংবশিংনা দিল্লিদা ঙাইহাক লৈতনা চৎলিবসি মনিপুরদা চহী অহুম শুরক্লবা ঈরাং অসি লোইশিলহন্ননবা সেন্তরগী লুচিংবশিংগা ৱারী শান্নবা চৎপা ওইগনি হায়না মীয়াম্না খল্লম্বনি অদুবু মদূগী ওন্ন-তৈনবদা ইন্দিয়ানা মনিপুরদা প্রোক্সি ৱার চত্থরকপগী খূদম চাংদমশিং নোংমা নোংমগী ময়েক শেংলক্লি। কুকি মিলিটেন্টশিংনা মৈতৈগী মথক্তা চত্থরক্লিবা মীহাৎ-মীপূনগী থৌওংশিং ঙসীদি নোংমা -নোংমগী হেঙ্গৎলক্লি।ইন্দিয়া লৈঙাক্কি থৌওংশিং অসী য়েংলুরগা ঐখোয় মনিপুরগী য়েলহৌমীশিং অসী ইন্দিয়ান অমা ওইরিব্রা নত্রগা ওইদব্রা হায়বসিগী ৱাহং অমা লাক্লে হায়না কোকোমি ৱিমেন ৱিংগী কো-কনভিনর শমজেৎশাবম মেমচানা ফোঙদোকখ্রে।
থা অসীগী ১৬ তা লৈস্না ৱিমেন ৱেলফ্যের কোইরেঙ্গৈ অমদি লৈমরেম্বি ৱিমেন ওর্গানাইজেসন কোইরেঙ্গৈ উরুম মপাল অনীনা শীন্দুনা, হন্দক ট্রোংলাউবীদা থোকখিবা তমথিরবা মীহাৎ অদূবু য়াম্না কন্না য়ানিংদবা ফোঙদোক্তুনা কোইরেঙ্গৈদা চত্থখিবা সিট-ইন প্রোটেষ্ট তা শরূক য়ারদুনা ৱা ঙাঙবদা মেমচানা ৱাফম অসী ফোঙদোকখিবনি। মহাক্না মখাতানা হায়, থীনূঙ্গৈদা থোকখিবা থৌদোক অদূ সেক্যুরিটি ফোর্সনা লানবনি হায়বদা করিসু লান্নিংঙায় ওইদে। সেক্যুরিটি ফোর্স নি হায়রগা খূৎলায় ময়াম পুদূনা চৎলবসু মশা-মশাবু সেক্যুরিটি ফোর্স কাঙবূনি হায়না মশক তাক্ননবা আই-কার্দ অমফাওবা পুথোকপা ঙমদবা হায়বসি লাইবক থীবনি।মনূঙদা অরোনবা এজেন্দা অমা লৈবা মাল্লি।হৌজিক্কি লুরবা তাঞ্জাশিদা সিভিল দ্রেশ শেৎলগা খূৎলায় ময়াম পুদুনা চৎলিবা মীওইশিং অদূনা মশাগী শক্তাক খূদম অমত্তা মীয়ামদা ঊৎপা ঙমদবা হায়বসি য়াম্না চাউনা চিংননিঙায় ওই হায়খি।
মীয়াম্না মখোয়বু চিংনফম থোকপনি। ঈরাং অসী নেমথহনগে হায়রবদি এন আর সি মপূঙফানা থবক্তা ওন্থোক্তুনা মীতোপ খন্দোক্কদবনি।রিলিফ কেম্পশিংদা লৈরিবা আই দি পিশিং মশাগী ময়ূমশিংদা হঞ্জিলহল্লবা মতূঙ, মীতোপ খন্দোক্তুনা তান্থোকখ্রবা মতূঙদা সেন্সসকি থবক পায়খৎকদবনি, মদূ নত্রিবমখৈ মনিপুরদা সেন্সস পায়খৎপা য়াখিরোই হায়বা ৱাফম মহাক্না ফোঙদোকখি।