ঐচ এস এল সি ইগজামগী দোক্যুমেন্ট পুথোকপা ঙমদবা ওফিসার ফাইন থীনবা খঙহনখ্রে

অদূঙৈ কুমশিং ২০১৮ দা পাঙথোকখিবা হায় স্কুল লিভিং সার্টিফিকেট (ঐচ এস এল সি) ইগজামিনেসনগী ৱাহংশিংগা মরী লৈননা মনিপুর ইনফোর্মেসন কম্মিসনগী মায়কৈদগী ষ্টেট লৈঙাক্কি মখাদা লৈরিবা ইদুকেসন (এস) দিপার্টমেন্ট কি মরী লৈনবা ইগজামিনেসন সেক্সনগী ওফিসিয়ল অমদা পাউখুম পীরক্নবা খঙহনখ্রবসু ওফিসার অদূনা পাউখুম পীবা ঙম্লক্তবদগী ফাইন থীননবা খঙহনখ্রে।

ৱাথোক ওইখিবা, কুমশিং ২০১৮ দা পাঙথোকখিবা ঐচ এস এল সি ইগজামিনেসন অদূগা মরী লৈননা রাইট টু ইনফোর্মেসন এক্ট ২০০৫ গী মখাদা থাঙ্গৎলকখিবা ৱাহংশিংগী পাউখুম পীরক্নবা কম্মিসন্না ইদুকেসন (এস) কি ওফিসার অমদা খঙহল্লবসু দোক্যুমেন্টশিং অদূ য়াওবা ফাইল থিবা ফংদ্রে হায়না পাউখুম পীরকপদগী কম্মিসন্না য়াম্না অঙকপা অমগা লোয়ননা হকচীন্না লৌরদুনা, মরী লৈনরিবা ওফিসার অদূগী মথক্তা এক্সন লৌখৎলকখিবনি।

আর টি আই এক্ট, ২০০৫ গী সেক্সন ২০ গী মখাদা ওফিসার অদূ দন্দি ফংফম থোকই হায়না কম্মিসন্না ওবজর্বেসন পীখি, লোয়ননা লূপা লীশীং মঙাগী শেনফম ফাইন ওইনা থীগদবনি অদুগা হায়রিবা ফাইনগী শেনফম অদূ গভর্নমেন্ট কি এক্কাউন্টদা হাপচীনগদবনি হায়না অকনবা ৱাফম খঙহনখি। ইদুকেসন (এস) কি এস পি আই ও ওইরিবা দিপার্টমেন্ট অসীগী জোইন্ট সেক্রেটরিনা পীরকখিবা পাউখুম অদূ আর টি আইগী রুল্স অমসুং রিগুলেসনশীং ভাইওলেৎ তৌবনি হায়না কম্মিসন অসিনা পেন্দবা ফোঙদোকখি।

এস পি আই ও অদূগী লিগেল ওফিসার ওইনা লেপখিবা এস দয়ানন্দনা হায়, মনিপুর ইনফোর্মেসন কম্মিসনগী য়াথং ঙাকপা ঙমখিদবসি য়াম্না লাইবক থীবনি, মরী লৈনবা ফাইল থিবা ফংদবদগী ফীভম অসি তাখিবনি। মতূঙ তারকপা মতমদা অসিগুম্বা থৌওংশিং থোকহন্দনবা চেকশীন্না হোৎনগনি হায়খি।