পাউমীদা এত্তেক ঙাইহাক লৈতনা চত্থরকপবু য়ানিংবা ঊত্তুনা অকনবা প্রোটেষ্ট তৌখ্রে

হৌখিবা য়ূমজকৈশা নুমীৎকি নুমিদাং পূঙ ৯.৪০ রোম তাবদা মনিপুরি লোলদা নুংতিগী ফোঙবা নহারোলগী থৌদাং পাউ-চেগী এদিটর খোইরোম লোয়ালাকপনা মশাগী হ্যুন্দাই ভরনা কার থৌদুনা ওফিসতগী ময়ূমদা হল্লকপগী লম্বীদা ইম্ফাল ইষ্ট দিষ্ট্রিক্টকি মনূঙচন্না লৈরিবা মিনুথোং হাফিজ হাত্তা এরিয়াদা শকখঙদবা খূৎলায় পায়বশিংনা এম্বুস তৌদুনা গারি অদূগী থোঙ-থোঙনাওশিংদা অকায় -অতোয় কয়ামরুম থোকহল্লবা মতূঙদা মহাক্কি মায়, মীৎ অমদি য়া নচিংবদা  ফূজীল্লকপদগী শোক্তুনা হোস্পিটালদা লায়কন্নহনখিবা থৌদোক অদূবু য়াম্না কন্না য়ানিংদবা ফোঙদোক্তুনা ঙরাং পাউমীশিংনা সিট-ইন-প্রোটেষ্ট কি খোঙজঙ চঙশীনখ্রে।

নোংমগী ওইবা প্রোটেষ্ট অদূ ওল মনিপুর ৱার্কিং জর্নেলিষ্ট য়ুনিয়ন (অমদু) অমসুং এদিটর্স গিল্ড মনিপুর (ই জি এম) অনীনা শীন্দুনা ইম্ফালদা লৈরিবা মনিপুর প্রেস ক্লবকি কমপ্লেক্স তা পাঙথোকখিবনি।পাউমীদা এত্তেক ঙাইহাক লৈতনা তৌদুনা অকি-অখঙ মায়োক্নহল্লকপা অসী হন্দক্কী অসিনা অহানবা নত্তে।মনিপুরগী দিজিপিনা অকনবা মীৎয়েং চঙদুনা পাউমীশিং অশোয়-অঙাম থোক্তনবা ফীভম অমা লৈহনবিনবা মমাঙদা কয়ারক হন্না মেমোরেন্দম পীশীনখ্রবসু ঙসীফাওবা থবক অমত্তা লৌখৎলক্তবদা অমজু অমদি ই জি এমগী মায়কৈদগী য়াম্না কন্না পেন্দবা ফোঙদোকখি।

ঙরাং মনিপুরগী চিফ মিনিষ্টর য়ূম্নাম খেমচান্দ গী মফমদা মরাল লৈবশিং অদূ অথূবা মতমদা ফাগত্তুনা আইনগী ওইবা অকনবা চৈরাক পীনবা মেমোরেন্দম অমসু অমজু অমসুং ই জি এম না অপূনবা ওইনা মেমোরেন্দম অমা পীশীনখি।পাউমীদা খূৎ থাদুনা লৈবাক অসীগী মীয়ামগী ফ্রীদম ওফ স্পিচ অমদি দেমোক্রেটিক প্রিন্সিপল্স দা শীঙনরিবা,খুনাইগী মহীকশিং অসী মশক খঙদোক্তুনা চৈরাক পীগদবনি হায়না মেমোরেন্দম অদুদা ফোঙদোকখি।