হৌখিবা এপ্রিল থাদা জম্মু অমসুং কাস্মিরগী পহলগাম লমদমদা ইন্দিয়ান টুরিষ্ট ২৫ অমসুং নেপাল নেস্নেল অমগা থারগা পূন্না মীচম টুরিষ্ট ২৬ পাকিষ্টান্না শৌগৎপা অমসুং লৈবাক অদূনা চঙজফম পীরিবা লাস্কর-ই-তাইবা, জাইস- ই-মোহম্মদ টেরর গ্ৰুপশিং অসীনা য়াম্না তমথীবা মওংদা কাপ্তুনা হাৎখিবা থৌদোক অদূগী মতীকচাবা পাউখুম ইন্দিয়ানা পীদনা তোক্লোই, ইন্দিয়াগী লৈমায়দগী টেরোরিজম মপূঙফানা মূত্থৎকনি হায়না প্রাইম মিনিষ্টর নরেন্দ্র মোদি, দিফেন্স মিনিষ্টর রাজনাথ অমসুং য়ুনিয়ন হোম মিনিষ্টর আমিট শাহানা লাউথোকখ্রবা মতূঙদা ইন্দিয়ান এয়রফোর্স অমসুং ইন্দিয়ান আর্মীনা মিসাইল এত্তেক চত্থদুনা লম্মন খুমখ্রে।
পাকিষ্টানগী টেরিটোরি মনূঙ অমসুং পাকিষ্টান ওক্যুপাইট কাস্মিরদা লৈরিবা টেরোরিষ্ট লূপশিং অসিগী হেদক্বার্টরশিং থারগা পূন্না টেরোরিষ্ট মোদ্যুল ৯ দা ইন্দিয়ান এয়রফোর্স অমসুং ইন্দিয়ান আর্মীনা প্রিসিজন মিসাইল এত্তেক চত্থদুনা ঙরাং অঙনবা অয়ুক্কি মতমদা মতীকচাবা লম্মন খুম্বগী থৌওংদু পাঙথোকখিবনি। মসীগী মমাঙদা, হৌখিবা নুমিৎ ৩/৪ নিগী মমাঙদসু পাকিষ্টান আর্মীনা হেভী আর্টিল্লরি কয়ামরুম কাপশীল্লক্তুনা ইন্দিয়ান মীচম অহুম হাৎখ্রবনি। ইন্দিয়ান এয়রফোর্স অমসুং ইন্দিয়ান আর্মীনা য়াম্না হৈ-শিংনা অমসুং থৌনা ফনা চত্থখিবা লম্মন খুম্বগী থৌওংদু লৈবাক অসীগী মীয়াম্না খম থেংনা অপেনবা অমসুং হরাওবা ফোঙদোক্নরক্লি।
মিসাইল এত্তেক চত্থখিবা অদুদা টেরোরিষ্ট ৫০ গী মথক্তা হাৎখ্রে, অদুগা ৬০ হেনবনা অশোক- অপন থোকহনখি হায়রি। পাকিষ্টানগী ওফিসিয়েলশিংনদি থৌদোক্তুদা মীওই ৮ শিখি অদুগা মীচম কয়া শোকখি হায়না পাউদমখি।য়ু এস প্রসিদেন্ট দোনাল্ড ট্রম্প অমসুং চাইনাগী মায়কৈদগী য়ূমথঙনরিবা পাকিষ্টান- ইন্দিয়া লৈবাক অনীমক্না পূক্নিং ফাথনরগা শান্টি ওইনা লৈননবা আপিল কয়াসু তৌনরকখ্রে। ইন্দিয়ানা চত্থখিবা মিসাইল এত্তেক অদূগী মমীংনা ওপরেসন সিন্দুর হায়না খঙনরি। অকোনবা ফংবা পাউগী লীখূল অমদা ফোঙদোরক্লিবদি, ঙরাংগী এত্তেক অদূদা টেরোরিষ্ট ৮০ গী মথক্তা শিখি হায়রি।