নর্সকি নুমিৎ পাঙথোকখ্রে, ঈ দান তৌখ্রে

লেদী ৱিথ লেম্প হায়রগা মালেম পূম্নমক্কি মীয়াম্না নুংশিনা শকখঙনরিবা ফিদম্নিঙায় ওইরবি ফ্লোরেন্স নাইটিঙ্গলগী মপোক নুমিৎ, মে ১২ দা চহী খূদীঙগী মালেম পূম্বগী লৈবাকশিংনা ইন্টর্নেস্নেল নর্সেস দেগী থৌরম পাঙথোক্নবগুম থা অসীগী ১২ দসু পাক-সন্না পাঙথোক্নখ্রে।
মনিপুরগী ওইনা তোঙান তোঙানবা হেল্থ সার্বিসকা মরী লৈনবা লূপশিং অমসুং লৈঙাক্কি এজেন্সিশিংনা শীন্দুনা নাইটিঙ্গলগী মপোক নুমিৎ অসিদা ইন্টরনেসনেল নর্সেস দেগী থৌরম পাঙথোকখি। মপূঙ ওইবা থৌরমদি ইম্ফাল ইষ্ট দিষ্ট্রিক্টকি পোরোম্পাত্তা লৈরিবা জৱাহরলাল নেহরু ইন্সটিট্যুট ওফ মেদিকেল সাইন্সেস (জেনিম্স) কি ওদিটোরিয়মদা পাঙথোকখিবা অদুনা ওইখি।
হন্দক্কি চহী অসীদা পাঙথোকখিবা ইন্টর্নেস্নেল নর্সেস দেগী থৌরম অদূগী মালেমগী ওইনা থমখিবা থিম্না, “ঐখোয়গী নর্সশিং, ঐখোয়গী তুংগী লম্বী, নর্সশিংদা শক্তি পীসি, মীওইবগী পুন্সি কনসি,” হায়বসিনি। দি ট্রেন নর্সেস এসোসিয়েসন, জেনিম্স য়ুনিটনা শীন্দূনা, হোস্পিটাল অসীগী ওদিটোরিয়মদা পাঙথোকখিবা থৌরম অদুদা মনিপুর লৈঙাক্কি হেল্থ এন্দ ফেমিলি ৱেলফেয়রগী জোইন্ট সেক্রেটরি অমদি ষ্টেট হেল্থ এজেন্সীগী সি ওসু ওইরিবা শমিম অহম্মদ শাহানা অথোয়বা মীথূঙলেন ওইনা শরূক য়াখি।
থৌরমদুদা জেনিম্সকি মেদিকেল সুপরিনটেনদেন্ট প্রোফেসার কে ঐচ লোকেশ্বরসু শরুক য়ারদুনা ৱা ঙাঙখি। নর্সশিংনা মশাগী থৱায়দগী হেন্না লূম্না নুংশিজবসি অনাবশিং অসীনি হায়না লোকেশ্বরনা থমখি।
থৌরমগী শরূক অমা ওইনা দোনর ৪০ হেনবনা ঈ দান তৌখি। হেল্পিং হেন্দস ফোর পিপল্স মনিপুরগা খূৎশম্নদুনা থৌরম অদূ পাঙথোকখিবনি।