মহাক্না মনিপুরগী চিফ মিনিষ্টর ওইনা থৌ পুখিবা মতমদা নেস্নেল রেজিষ্টর ওফ সিটিজন্স (এন আর সি) মপূঙ ফানা চৎনহন্নবা অখন্নবা খোঙথাঙ কয়া লৌখৎখি অদূগা মনিপুর ষ্টেট পোপ্যুলেসন কম্মিসন অমা লিংখত্তুনা লমদমসিদা চঙশীল্লকপা মীতোপশিং মশক খঙদোক্তুনা মরমদমদা তকথোকখিনবা অকনবা থৌরাংসু পায়খৎলম্মি হায়না মনিপুরগী হান্নগী চিফ মিনিষ্টর নোংথোম্বম বিরেন না ফোঙদোকখ্রে।
মহাক্না চিফ মিনিষ্টর ওইরিঙৈ মতমদা মীতোপ খন্দোক্নবা অখন্নবা থৌশিল অমত্তা লৌখৎলমদে হায়না ফোঙদোক্নরকখিবা ৱাফমশিংগী মতাঙদা পাউখুম ওইনা সোসিয়েল মীদিয়াদা থাগৎলকখিবা মহাক্কি ৱারোলদা হান্নগী চিফ মিনিষ্টর অসীনা ৱাফম অসী ফোঙদোরকখিবনি। মহাক্না হায়, ইং কুমশিং ২০২২ দগী ২০২৪ ফাওবগী মতমদা এন আর সি থবক্তা ওন্থোক্নবা অমদি মনিপুরগী তোঙানবা পোপ্যুলেসন কম্মিসন অমা লিংখৎনবা এসেমব্লিদা অখন্নবা এজেন্দা হাপ্লম্মি, ৱারেপ কয়াসু লৌদুনা ইন্দিয়া লৈঙাক্কি মফমদা থবক পায়খৎলক্নবা তকশীন্নবা হোৎনরমখি।গেজেট নোটিফিকেসন ফাওবা থোকখি হায়না ফোঙদোরক্লি।
কুমশিং ২০২২ গী আগষ্ট ৫ দা এসেমব্লিনা ষ্টেট অসীগী পোপ্যুলেসন কম্মিসন অমা লিংখৎনবা অমদি এন আর সি চৎনহন্নবা ৱারেপ লৌখি। কুমশিং ২০২৩ গী অঙনবা শরুক্তা গেজেট নোটিফিকেসন ফাওবা থোক্তুনা মনিপুর ষ্টেট পোপ্যুলেসন কম্মিসন শেম্ননবা থৌরাং লৌখৎখি।অখন্নবা কম্মিসন অসীনা মনিপুরদা মীশীং হেনগৎলকপগী থৌওং অমদি দেমোগ্ৰাফিদা অহোংবা লাকপা কয়াগী মতাঙদা য়েংশিন্দুনা মতম মতমগী রিপোর্টশিং লৈঙাক্তা পীখৎকদবনি হায়রক্লি।
কুমশিং ২০২৪ গী মার্চ থাদা ফমখিবা এসেমব্লীগী এজেন্দাদা এন আর সিগী মতাঙ য়াওখিবনি। মদূগী রিজোল্যুসন ফাওবা লৌখ্রবনি। ষ্টেট অসীদা এন আর সি ইমপ্লিমেন্ট তৌননবা ইন্দিয়া লৈঙাক্তা তকশীন্ননবা ফিরেপসু লৌবা লৈখ্রবনি হায়না ফোঙদোরক্লি।
