মীয়ামগী অৱাবা কয়াসিগী য়েংলগা টোটেল সটদাওনগী খোঙজঙ খূদক্তা হন্দোকপিয়ু: গোবিন্দাস

মনিপুরগী মীয়াম্না হৌখিবা চহী অহুমগী মতমসিদা থোক্লিবা হীঙশাগী ঈরাঙশিংগী মরক্তা খম থেংনা অৱাবা মায়োক্নদুনা লাক্লি।চৈরকশিদা বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিং ওইগনি হায়না চিংনবা খূৎলায় মতীকচানা পায়বশিংনা অঙাং মচীন-মৌপ্ৱা অনী হাৎখিবগী মতাঙদা শেমখিবা জে এ সিনা এপ্রিল ১৯ গী অহীঙদগী মনিপুর পূম্বগী ওইনা কৌখিবা নুমিৎ মঙানিগী টোটেল সটদাওননা লমদম অসিগী মীয়ামগী মহৌশাগী পুন্সিদা চাউনা অপনবা অমদি অকায়বা থোকহল্লে।

মীয়ামগী অৱাবা, খুদোংচাদবশিং অসী য়েংলগা জে এ সী না মখোয়গী টোটেল সটদাওনগী খোঙজঙ অসী খূদক্তা হন্দোকপিয়ু হায়না মনিপুর লৈঙাক্কী হোম মিনিষ্টর গোবিন্দাস কোন্থৌজম্না মরী লৈনবশিংদা আপিল তৌরক্লি। চিফ মিনিষ্টর সেক্রেটরিয়েত্তা ঙরাং পাঙথোকখিবা পাউমীশিংগা উনবগী থৌরমদা মহাক্না ৱাফম অসী ফোঙদোকখিবনি। মিনিষ্টরনা হায়, হন্দক এপ্রিল ১৮ দা ঊখ্রূল দিষ্ট্রিক্টকি টি এম কসোম ভিল্লেজ মনাক্তা মিলিটেন্টশিংনা মীচম অনী নোংমৈনা কাপ্তুনা হাৎখিবা, অদূগা মীচম কয়ামরুম শোকহনখিবা অদূ লৈঙাক অসিনা খ্বাইদগী অকনবা মওংদা কন্দেম তৌই।কেস অদূ এন আই এদা শিন্ননবা ৱারেপ লৌখ্রে হায়খি।

মিলিটেন্টশিং অদূ অথূবা মতমদা ফাগৎনবা সেক্যুরিটি ফোর্সনা পাক-সন্না ওপরেসন চত্থবা হৌখ্রে। অতোপ্পা ষ্টেটশিংদা মীখল পাঙথোকপগা মরী লৈননা মনিপুরদা দিপ্লোয় তৌরম্বা সেন্ট্রেল আর্ম পুলিস ফোর্স (সি এ পি এফ) কম্পনি ২৭২ গী মনূঙদা কম্পনি ৮৮ লৌথোকখ্রে অদুবু য়াম্না থুনা অমূক লাক্লগনি।  কাউন্টর ইন্সর্জেন্সি ওপরেসন্দা কা হেন্না হৈ-শিংলবা সেক্যুরিটি ফোর্স কি কাঙবূ অমসু মনিপুরদা থুংলরগনি।সেন্ট্রেল ফোর্সশিংনা শীজীন্ননবা মখল ক‌য়াগী গারিশিংসু থুংলরে।আইনগী মায়োক্তা লৈবশিং ফাগত্তুনা চপচাবা এক্সন লৌগনি হায়খি।