মার্ক ৱাংনা ফংদুনা মায় পাক্লকখ্রবা মহৈরোয়শিংবু তরাম্না ওকখ্রে

কাঞ্চিপুরদা লৈরিবা মনিপুর য়ূনিভর্সিটি মনাক্তা লৈবা ইম্ফাল পব্লিক হায়র সেকেন্দরি স্কুলগী মেনেজমেন্ট কম্মিটি অমসুং টিচিং ষ্টাফনা শীন্দুনা, হন্দক ফল লাউথোকখ্রবা ক্লাস টেন অমসুং তুয়েল্ব ইগজামিনেসন, ২০২৬ তা মার্ক ৱাংনা ফংদুনা মায় পাক্লকখ্রবা স্কুল অসীগী মহৈরোয়শিংবু হরাও-তরাম্না ওকপগা লোয়ননা ঙমজবা খূদোলপোৎশিং পীদূনা পূক্নিং থৌগৎপগী থৌরম অমা ঙরাং স্কুল অসীগী কেম্পসতা পাঙথোকখ্রে।

থৌরমদুদা স্কুল অসীগী ফাউন্দর প্রিন্সিপাল, হেদ মিষ্ট্রেস , মহৈরোয়শিং অমদি গার্জিয়ানশিং শরূক য়াখি। মহৈ-মশিন তম্লিঙৈগী পুন্সিদা, মমা-মপা ওইবশিংনা খরচ খূদীংমক পুথোক্তুনা হোৎনবিরিবা মতমসিদা  মহৈরোয়শিংনা থৱায় য়াওনা হোৎনদুনা তুংদা মতীক চাবা, মায় পাকপা মীওই অমমম ওইবা ঙম্ননবা হোৎনগদবনি। মথক থোংবা অহল-লম্মনশিংদা থকশী-খাসি লৈনা থৌগল্লোন ঊৎকদবনি। থকশী-খাসি য়াওদ্রবা মহৈরোয়শিংদি কৈদৌনুংদা, পুন্সিদা মায় পাকপা ঙম্লোই অদূগা খঙদবা মতাঙদা অখঙ-অহৈ, ওজা-গুরুশিংদা হংবসু ইকায়রোইদবনি হায়বা ৱাফম স্কুল অসীগী ফাউন্দর প্রিন্সিপাল আসেম কেন্নেদিনা থৌরমদুদা তিনখিবা মহৈরোয়শিংদা ফোঙদোক্তুনা অফবা পাউতাক পীখি।

হন্দক পাঙথোকখিবা ইগজামিনেসনশিংদা স্কুল অসীগী মহৈরোয়শিংনা মার্ক য়াম্না ৱাংনা ফংদুনা স্কুলগী মিংচৎ পুরকপদা থোইদোক-হেন্দোক্না হরাওবা অমসুং চাউথোকচবা ফাওই হায়না স্কুল অদূগী হেদ মিষ্ট্রেসনসু অপেনবা ফোংদোকখি। মার্ক ৱাংনা ফংদুনা স্কুলগী মিংচৎ পুরকখিবা মহৈরোয়শিং অদুদা অচম্বা খূদোলশিং স্কুলগী মায়কৈদগী তমদুনা পূক্নিং থৌগৎখি।