ইন্দিয়ানা ব্রিটিশকি মখূত্তগী নীংতম্বা ফংলবা মতূঙদা লৈবাক অসীগী পারলিয়ামেন্ট তা খ্বায়দগী মতম শাংনা এম পি ওইরমখিবা অমসুং মনিপুরগী চিফ মিনিষ্টর ওইনসু মতম খ্বায়দগী শাংনা মীয়ামগী থৌগল তৌরমখিবা কংগ্রেস লুচিংবা রিশাং কৈশিং লৈখিদবগী ৯ শুবা কুম্মোন থৌরম ঙরাং পাঙথোকখ্রে।
ইম্ফালগী বি টি রোদতা লৈরিবা কংগ্রেস ভবন্দা মনিপুর প্রদেশ কংগ্রেস কম্মিটি (এম পি সি সি) না শীন্দুনা পাঙথোকখিবা থৌরম অদূদা কংগ্রেস লেজিসলেচর পার্টিগী লিদর অমসুং মনিপুরগী হান্নগী চিফ মিনিষ্টর ওক্রম ইবোবি, এম পি সি সিগী প্রসিদেন্ট কৈশাম মেঘচন্দ্র, কংগ্রেস ৱার্কিং কম্মিটি (সী দব্লিয়ু সি) গী মেম্বর অমসুং মনিপুরগী হান্নগী দিপ্যুটি চিফ মিনিষ্টর গাইখাঙম, এম এল এশিং, হান্নগী এম এল এশিং, হান্নগী এম পিশিং অমসুং পার্টিগী লুচিংবা কয়া শরুক য়াখি।রিশাং কৈশিং অসী পার্টিগী অমসুং মনিপুর মীয়ামগী য়াইফনবা কত্থোকপা অমগা লোয়ননা অরোয়বা য়াহীপ তাল্লমদাই ফাওবা হোৎনরম্বা, য়াম্না ফিদম্নিঙায় ওইরবা লুচিংবা অমনি। মহাক্না মনিপুরগী অপূনবা শক্তম কায়হন্দনবা,হিংমিন্নবগী ৱাহন্থোক লৈনবা, কাঙলূপশিংগী মরক্তা নুংশি- চান্ননা লৈমিন্ননবা অহীঙ-নুংথিল নাইদনা হোৎনরম্মী।
মদূগী মায়োক্তা লৈবশিংনা মহাক্কি অরোয়বা মথৌ মঙমফাওবা মশাগী পোক্নফম খুঙ্গংদা পাঙথোকপা য়াহনখিদে, অথিংবা থমখি হায়না ইবোবিনা ফোঙদোকখি।ঐখোয়না লুচিংবা অসীগী খূদুং ইন্দুনা লমদমসিগী অপূনবা শক্তম কায়হন্দনবা পূন্না হোৎনমিন্নরসি হায়না ইবোবিনা ফোঙদোকখি। মীয়াম্না লৈখিদ্রবা লুচিংবা অসীগী ফোতোদা লৈ-শু কত্তুনা ঈকায়খুম্নবা ঊৎখি।