হৌখিবা ওক্টোবর ২৮ দগী মাঙখিবদগী মীয়াম অমসুং সেক্যুরিটি ফোর্সনা থিনদুনা লাকখিবা তাফৌ কুকি ভিল্লেজদগী কুকি-জো ফূরূপকি নহা অনী অদূ অশীবা হকচাং ওইনা ফংখ্রে। মখোয় অনীগী থৱায় য়াওদ্রবা হকচাংশিং অদু সেনাপটি দিষ্ট্রিক্ট কি মনূঙচনবা সেনাপটি-ফাইবুং রোদ তগী ঙসী অয়ূক ফংখিবনি হায়না পুলিসনা ফোঙদোরকখ্রে।
লৈখিদ্রবশিং অদূ থাঙ্গিনলুন চোংলোই (২১) অমসুং পাউগিনলাল হাংসিং (২০) নি ।মখোয়গী হকচাংশিং অদূ সেক্যুরিটি গী জোইন্ট সর্চ ওপরেসনদা ঙসী অয়ূক পূং ৭:৩০ রোম তারকপদা নেস্নেল হায়ৱে-২ দগী নোংপোক্লোমদা কিলোমিটর ১৩-১৪ রোম চৎলগা লৈবা মফম অমদগী ফংখিবনি হায়রি। মখোয় অনীদু মনিপুর পুলিস, কোব্রা, এ আর,সি আর পি এফ অমসুং আর এ এফকি জোইন্ট টিম অমনা সর্চ ওপরেসনশিং চত্থবগা লোয়ননা থিরকখিবনি। হকচাং অনীদূ কাংপোকপি দা লৈবা হোস্পিটালদা পোষ্ট মোর্টেমগীদমক পুরকখ্রে।
থৌদোক অদূদা চেন্নবা মীওইশিং ফাগৎনবগীদমক সেক্যুরিটিগী অহেনবা টিমশিং চঙশীন্দুনা সর্চ ওপরেসনশিং হেন্না কনশীনখ্রেসু হায়রি।
