খুল ঙাকপা ঈচাশিং সেক্যুরিটি ফোর্সনা ফাবা, হাৎপা য়ারোই হায়বা ঈমাশিংগী খোঙজঙ পাকথোক-চাউথোরক্লি

লৈঙাক্না সেক্যুরিটি ফোর্স থাদোক্লগা খুল ঙাকপা ঈচাশিং ফাহনবা, হাৎহনবা কৈদৌনুংদা য়াবা ঙম্লোই হায়না মৈরা পায়বী ঈমাশিংনা অকনবা খোঙজং চঙশীন্দুনা লাক্লিবা অদূ হৌজিক মখা তানা হেন্না পাকথোক- চাউথোরক্লি। মোইরাং হনুবা য়ূদেভলপমেন্ট ক্লবনা থাদোরকপা চেরোলগী মতূঙ ইন্না, হৌখিবা কুমশিং ২০২৩ গী মে অহুমদগী কুকি- জো কাঙলূপকি নার্কো- টেরোরিষ্টশিংনা লুচিংদুনা মৈতৈ ফূরূপকি মথক্তা কাইহৌরুবা লৈতনা চত্থরক্লিবা হীঙশাগী ঈরাং অসীদা মৈতৈ ফূরূপকি নূপী-অঙাঙ কয়া য়াওনা মমল য়াম্লবা নহারোল অমসুং অহল কয়ামরুম তমথীবা মীহাত্তা হাৎতোকপিখ্রে।

মপান লৈবাকশিংদগী চঙশীল্লকপা ফোরেন ইম্মিগ্ৰেন্টশিংনা মীয়াম পাক্তক্ননা হাৎলক্তুনা মনিপুর থুগাইনবা হোৎনরক্লিবা অমসুং মনিপুরদগী লম খাইদোক্লগা মখোয়গী হোমলেন্দ অমা শেমগৎনবা পান্দমদা সেপরেট এদমিনিষ্ট্রেসনগী দিমান্দ তৌদুনা লান্দারক্লিবা অসীদগী খুন্নাই অসীগী মীয়ামগী পুন্সি অমসুং লন-থুম কন্ননবা ভিল্লেজ ভল্লন্টিয়র ঈচাশিং চোংথোরকপনি।  কুকি- টেরোরিষ্ট লাকশীনবগী মহুত্তা লমদম অসীদা লৈরিবা সেন্ট্রেল সেক্যুরিটি ফোর্সশিংনা তুমিন্না কুমহৈগুম য়েংদুনা লৈথোকখিবদগী ঐখোয়গী মমল য়াম্লবা মীওই কয়া শিহনখিবনি। মনিপুর কন্ননবা অমসুং মীয়ামগী পুন্সি কন্নবা চোংথোরক্লিবা ঈচাশিং অসী লৈরমদ্রবদি খুন্নাই অসী তুম্না মাঙখিগদৌরিবনি।

অসীগুম্বা মমল য়াম্লবা ঈচাশিং অসিদা ওন্সীন্দুনা সেক্যুরিটি ফোর্সনা ফাবা, পুনবা, হাৎপা কৈদৌনুংদা য়াবা ঙম্লোই হায়না ঈমাশিংনা ফোঙদোক্নরি হায়রি। ফক্নুং সোসিয়েল য়ূথ ক্লব অমসুং লমদম অসোমগী লৈকায়শিংদগী ঈমা মৈরা পায়বীশিংনা থোক্লক্তুনা ঐখোয়গী খুল ঙাক্লিবা ঈচাশিং সেক্যুরিটি ফোর্সনা ফাবা, হাৎপা কৈদৌনুংদা য়াবা ঙম্লোই হায়না অকনবা খোল্লাউশিং চৎলিবা থা অসীগী ১৬ তা লাউখি।