ঈষ্ট টিমোরগী প্রসিদেন্ট মনিপুরদা মে থাদা লাক্কদৌরি: লিসিপ্রিয়া

পীকচরবসু মনিপুর অসী মরৈবাক-মরমদম নুংশিজবা মপারি মমোমশিংনা মশা- মশাগী থৱায়দগী হেন্না নীঙজদুনা স্পোর্টস, হেন্দলূম এন্দ হেন্দিক্রাফট, কলচরনচিংবগী এক্টিভিষ্ট, এথলেথ কয়ানা মালেমদা মশক তাক্তুনা, মালেম পূম্বনা শকখঙলিবা ঈরমদম অমা ওইদুনা লাক্লি। মালেমনা শকখঙনরবী, মশাগী চহী ১৫ রোমদমক ঙায়রিবী এনভাইরনমেন্ট অমসুং ক্লামেট এক্তিভিষ্ট অমসু ওইরিবি লিসিপ্রিয়া কাঙুজম্নসু মহাক্কি তোঙান-তোঙানবা কেপাসিটিদা থবক তৌরক্তুনা মনিপুরবু মালেমগী মীয়ামদা শক্তাকপগী থবক-থৌরমশিং পায়খৎলক্লি।

ইষ্ট টিমোর লৈঙাক অমসুং লমদম অদূগী মীয়ামগা খ্বায়দগী তোরোৎ-খাদান্ননা, নকশীন্ননা লোয়নদুনা লাক্লিবি লিসিপ্রিয়ানা লৈবাক অদূগী লৈঙাক্কা খূৎশম্নরগা মনিপুর মীয়ামগী তুংকোইনা কান্নহৌরগদবা রিক্রিয়েশন সেন্টর, মীয়াম তিনফম হোলনচিংবা কয়ামরুম ইষ্ট টিমোরগী প্রসিদেন্ট গী মিংদা শাগৎলক্লি। পূম্নমক অসী লিসিপ্রিয়াগী হোৎনজমন্নি, মহাক্কি ক্রেদিৎনি হায়বদা লাল্লরোই। শেমগৎ-শাগৎলক্লিবা কয়া অসী খোংজোম ৱার মেমোরিয়েল গেটকি মায়োক্নবদা লৈরিবা শমরামদা ইষ্ট টিমোরগী প্রসিদেন্ট দা. জোস রামোস হোর্টোগী মিংদা শাবা ইন্টর্নেস্নেল পিস সেন্টর অমসুং ইষ্ট টিমোর ইনফোর্মেসন সেন্টর দা হাপচিনবনি হায়না লিসিপ্রিয়ানা ফোঙদোকখি। সেন্টর অনী অসী শাবা লোইরদূনা ঙরাং শঙ্গাবগী থৌরমদা মহাক্না ৱাফমশিং অসি ফোঙদোকখিবনি।

ইষ্ট টিমোরগী প্রসিদেন্ট অসী চহী অসিগী মে থাদা মনিপুরদা লাক্কনি হায়নসু লিসিপ্রিয়ানা থৌরমদুদা ফোঙদোকখি।মালেমগী লৈবাক অমগী প্রসিদেন্ট নত্রগা প্রাইম মিনিষ্টর অমনা অতম্ননা মনিপুরদা লাকপা অসী লমদম অসীগী পুৱারিদা হন্দক্কি অসিনা অহানবা ওইগদৌরি।ইষ্ট টিমোরগী প্রসিদেন্ট অসী নোবেল পিচ লোরেট অমসু ওইরিবনি।